Yoshlar ittifoqi Namangan viloyat kengashining navbatdan tashqari yig‘ilishi bo‘lib o‘tdi. Bu haqda “Daryo” muxbiri xabar bermoqda.
Mazkur yig‘ilishda viloyat kengashining o‘tgan bir yildan ziyod vaqt davomidagi faoliyati sarhisob qilinib, tanqidiy-tahliliy ko‘rib chiqildi.
O‘zbekiston yoshlar ittifoqi markaziy kengashi raisining o‘rinbosari O‘tkir Shukurov so‘zga chiqib, Namangan viloyatida yoshlar bilan ishlash bugungi kun talabiga to‘laqonli javob bera olmayotgani, ittifoq xodimlarining aksariyati o‘zining funksional vazifalarini anglay olmayotganini qayd etdi. Tashkilotning Uchqo‘rg‘on, Chust va Norin tumanlari kengashlari faoliyati xususida e’tirozlar bo‘ldi.
“Yoshlar – kelajagimiz” Davlat dasturini keng targ‘ib etish hamda uning ijrosini ta’minlash masalasiga jiddiy e’tibor qaratish lozimligi ta’kidlandi.
Yoshlar ittifoqi davlat tomonidan belgilangan imtiyoz va qulayliklarni qo‘llashda qarindosh-urug‘chilik, tanish-bilishchilik, korrupsiya kabi salbiy holatlarga yo‘l qo‘ymasligi ham muhim vazifa ekanligi aytib o‘tildi.
Yig‘ilishda tashkiliy masala ko‘rildi. O‘zbekiston yoshlar ittifoqi markaziy kengashi ta’sischiligidagi “Yoshlar agroklasteri” direktori Abdulaziz Mo‘minov O‘zbekiston yoshlar ittifoqi Namangan viloyati kengashi raisi vazifasini bajaruvchi etib tayinlandi. O‘tgan bir yil mobaynida viloyat yoshlar tashkilotini boshqarib kelgan Ilyosbek Rahimov esa “Yoshlar – kelajagimiz” respublika jamg‘armasi ijrochi direktorining birinchi o‘rinbosari lavozimida ish boshlaydigan bo‘ldi.
Ma’lumot o‘rnida, Abdulaziz Mo‘minov 1990-yilda Namangan shahrida tug‘ilgan. Namangan muhandislik-pedagogika instituti va Toshkent davlat arxitektura va qurilish institutini tamomlagan. Talabalik yillarida Beruniy nomidagi davlat stipendiyasi sovrindori bo‘lgan. Mehnat faoliyatini “Kamolot” yoshlar ijtimoiy harakati Namangan viloyat kengashida boshlagan va turli vazifalarda samarali ish olib borgan.
Izoh (0)