Buxoroda ikki qavatli bino qulab tushdi. 2 kishi halok bo‘ldi

Buxoroda ikki qavatli binoning qisman qulab tushishi 2 kishining o‘limiga sabab bo‘ldi. Bu haqda “Nuz.uz” xabar bermoqda.

Hodisa 2-avgust kuni sobiq yog‘ochni qayta ishlash zavodi o‘rnidagi ikkilamchi metall bozori hududida ro‘y berdi.

Buxoro shahar IIB vakillariga ko‘ra, bino qulab tushishiga savdo kompleksi qurilishi sabab bo‘lgan. Bu yerdagi ishlar rasmiy idoralardan tegishli ruxsat olgan xususiy qurilish korxonasi tomonidan amalga oshirilgan.

“Fojiadan ikki kun avval quruvchilar chuqurligi 2,5, o‘lchami esa 17x15 metr bo‘lgan kotlovanni kavlashni yakunlagandi. Bu bino qulab tushishiga olib keldi. Hodisa oqibatida voqea joyi yaqinida bo‘lgan Matiz va Tico rusumli mashinalarda bo‘lgan ikki kishi halok bo‘ldi”, — dedi IIB tergov bo‘limi boshlig‘i Rustam Ashurov.

Mazkur holat yuzasidan IIB tergov bo‘limi tomonidan jinoiy ish qo‘zg‘atildi, tegishli ekspertiza belgilangan.