O‘zbekiston Respublikasi Ichki ishlar vazirining maslahatchisi general-polkovnik Zokir Almatov boshligidagi ishchi guruh Xorazm viloyatiga tashrif buyurdi. Bu haqda viloyat IIB “Daryo”ga ma’lum qildi.
Ishchi guruh a’zolari dastlab Urganch shahridagi 4-sonli ichki ishlar bo‘limi faoliyati bilan tanishdi. Eslatib o‘tamiz, ushbu ichki ishlar bo‘limi respublikada ilk marotaba huquqiy ekspriment tariqasida sektorlar kesimida tashkil etilgan ichki iishlar bo‘limlaridan biridir. Bo‘lim faoliyati va u yerda yaratilgan shart-sharoitlar ishchi guruh a’zolarida katta taassurot qoldirdi.
Shundan keyin Xorazm viloyati musiqali drama teatrida yig‘ilish va ijodiy uchrashuv bo‘lib o‘tdi.
Yig‘ilishda viloyat hokimi, huquq-tartibot organlari mas’ul xodimlari, jamoatchilik tashkilotlari vakillari va bir guruh ichki ishlar xodimlari ishtirok etdi.
Yig‘ilishda so‘zga chiqqan vazir maslahatchisi general-polkovnik Zokir Almatov bugungi kunda amalga oshirilayotgan islohotlar mazmun-mohiyatiga to‘xtalar ekan, jinoyatchilik va huquqbuzarlikka qarshi kurashda huquq-tartibot organlari, jamoatchilik tashkilotlari va keng jamoatchilik hamkor, hamfikr bo‘lishi kerakligini alohida ta’kidlab o‘tib, hamkor tashkilotlarga minnatdorchilik bildirdi. Jinoyatchilikka qarshi kurashda faollik ko‘rsatgan bir guruh profilaktika inspektorlari, mahalla fuqarolar yig‘inlari raislari va mahalla posbonlariga qimmatbaho sovg‘alar topshirildi.
Xiva shahridagi 20-son Mehribonlik uyining bir guruh tarbiyalanuvchilariga biometrik pasportlarning tantanali topshirilishi ushbu tadbirdagi unutilmas onlardan biri bo‘ldi desak mubolag‘a bo‘lmaydi.
Ishchi guruh tarkibida Xorazm viloyatiga tashrif buyurgan kino va teatr aktyori, O‘zbekiston va Qoraqalpog‘iston xalq artisti Yodgor Sa’diyev tomonidan Vatanni va mardlikni ulug‘lovchi kuy va qo‘shiqlar, monologlar tadbirda ishtirok etganlarga ko‘tarinki kayfiyat baxsh etdi.
Shundan keyin ishchi guruh a’zolari Urganch shahrining Kamolot mahallasida 4 nafar profilaktika inspektorlari uchun barpo etilgan xizmat uylariga qilingan tashrif profilaktika inspektorlarining oila a’zolari bilan samimiy va do‘stona suhbatga ulanib ketdi.
Ichki ishlar Vazirining maslahatchisi boshligidagi ishchi guruhi viloyat IIB tezkor vazifalarni bajaruvchi safarbar otryadi shaxsiy tarkibi bilan uchrashib, ularning jangovor shayligi va yaratilgan shart-sharotlar bilan yaqindan tanishdi.
Xorazm viloyati IIBda tashkil etilgan “Mehnat va jangavor shuhrat muzeyi”ga tashrif buyurgan ishchi guruh a’zolari u yerda nafaqat viloyat ichki ishlar organlari tarixiga balki respublika miqiyosida ahamiyatga molik eksponatlar to‘planganligini alohida e’tirof etishdi. Ishchi guruh a’zolari muzeyda yuritilayotgan “Faxriy mehmonlar kitobi”ga o‘z dil izhorlarini qayd etdi.
General-polkovnik Zokir Almatov va Xorazm viloyati hokimi vazifasini bajaruvchi Farhod Ermanovlar bu yil Xorazm viloyatidan Haj amallarini ado etish niyatida yo‘lga chiqqan bir guruh fuqarolar bilan uchrashib ularga oq yo‘l tiladi.
Izoh (0)