O‘zbekistonda 1-avgustdan barcha hududlar uchun 1 kilogramm suyultirilgan gaz narxi 800 so‘m etib belgilandi. Belgilangan qiymatdan yuqori narxda gaz sotish holati kuzatilsa, kimga murojaat qilish kerak?
“O‘zbekneftgaz” AJ boshqaruvi raisining o‘rinbosari Odil Temirovning izoh berishicha, jamiyatning mamlakat bo‘ylab gaz ta’minoti bo‘yicha hududiy bo‘linmalari mavjud, ularning har birida ishonch telefoni ishlab turibdi. Iste’molchilar tizimda qonunbuzarlikni payqasa, murojaat qilishi mumkin. Har bir murojaat ko‘rib chiqiladi va chora ko‘riladi.
Temirovga ko‘ra, Vazirlar Mahkamasining 2017-yil 11-oktabrdagi qaroriga muvofiq, suyultirilgan gaz bilan ishlaydigan yangi gaz quyish shoxobchalarini ochishga litsenziya berish to‘xtatildi. Istiqbolda suyultirilgan gazni avtomobil gaz quyish shoxobchalariga yetkazib berish ham to‘xtatiladi, deya taxmin qilish mumkin. Shu bois avtomobil egalari boshqa turdagi yoqilg‘idan foydalanishga o‘tmoqda.
Shuningdek, “O‘zbekneftgaz” AJ boshqaruvi raisining o‘rinbosari gaz ballonlarini yetkazib berish masalasiga ham oydinlik kiritib o‘tdi. Gaz ballonlarini ishlab chiqarish va sinovdan o‘tkazish “O‘zneftgazmash” AJ tarkibiga kiruvchi Chirchiq, Buxoro va Qo‘qondagi zavodlarda amalga oshiriladi. O‘tgan yili aholiga 750 ming donadan ortiq yangi suyultirilgan gaz balloni yetkazib berilgan, bu yilgi reja esa 634 ming dona.
Izoh (0)