Davlat test markaziga Feldegerlik xizmati tomonidan maxfiyligi va daxlsizligini ta’minlagan holda test natijalarini Qoraqalpog‘iston Respublikasi, viloyatlar va Toshkent shahridan qaytarish 1-avgust kuni soat 18:30 dan boshlandi. So‘nggi materiallar Farg‘ona vodiysidan kechasi 2:30 da yetib keldi. Bu haqda Bosh vazir o‘rinbosari Aziz Abduhakimov ma’lum qildi, deya xabar beradi O‘zA.
Yetib kelgan test natijalari bo‘yicha darhol kompyuter yordamida qayta ishlash jarayoni boshlanadi. Davlat test markazining xodimlari tashqariga chiqmasdan, telefon va boshqa aloqa vositalaridan foydalanmagan hamda test materiallarining maxfiyligini ta’minlagan holda test materiallarini qayta ishlaydi.
Sinovlarning birinchi kuni ijtimoiy tarmoqlarda test savollari tashqariga chiqib ketganligi to‘g‘risidagi xabarlar tarqatilgan. Ushbu holatlar bo‘yicha tegishli ma’lumotlar huquqiy baho berish uchun huquqni muhofaza qiluvchi organlarga berildi.
Shuningdek, ayrim binolarda test jarayonlarini onlayn kuzatish uchun qo‘yilgan monitorlardagi tasvirlarni uzilib qolish hollari axborot texnologiyalari sohasining malakali mutaxassislari tomonidan zudlik bilan bartaraf etildi va bunday holatlarga boshqa yo‘l qo‘ymaslik choralari ko‘rildi.
1-avgust kungi test natijalari 2-avgust kunning ikkinchi yarmida Davlat test markazi saytida e’lon qilinadi.
Izoh (0)