O‘zbekiston Prezidentining “2018—2019-yillarda turizm sohasini rivojlantirish bo‘yicha birinchi navbatdagi chora-tadbirlar to‘g‘risida”gi qaroriga muvofiq, O‘zbekiston Turizmni rivojlantirish davlat qo‘mitasi tomonidan Interactive System kompaniyasi bilan hamkorlikda xizmat ko‘rsatish sifatini monitoring qilish va boshqarish tizimi — Hospitality Contract dasturi loyihasini ishlab chiqish va joriy qilish ishlari boshlandi. Bu haqda qo‘mita xabarida aytiladi.
Dasturni amalga oshirish loyihasi 2018-yilning 1-avgustiga mo‘ljallangan bo‘lib, keyinchalik doimiy asosda amal qiladi.
“Kun.uz” ma’lumotlariga ko‘ra, qo‘mita bilan “Mehmondo‘stlik shartnomasi”ni imzolagan tashkilotlar o‘z zimmasiga quyidagi majburiyatlarni oladi:
- Xodimlar barcha mehmonlarni yuzda tabassum bilan kutib olishlari kerak, ya’ni kelgan mehmon o‘zining kutilgan ekanini his qilishi kerak.
- Xodimlarning nutqi rivojlangan bo‘lishi kerak. Imkon qadar ma’lumotlarni mehmonlarga qulay tillarda (kamida o‘zbek, rus va ingliz tillarida) yetkazish maqsadga muvofiqdir. Mehmonlar bilan xushmuomala bo‘lish zarur. Ularga bu borada muntazam ravishda maxsus treninglar o‘tkaziladi.
- Xodimlar did bilan ozoda kiyingan bo‘lishlari kerak (maxsus uniformalar).
- Personal barcha qo‘ng‘iroqlarga xushmuomala javob qaytarishi kerak. Telefonda tizimli ravishda javob berish talab etiladi. (Mijozlar qo‘ng‘iroq qilishganida “Assalomu alaykum. Bu “...” qahvaxonasi yoki “..”" restorani. Qanday xizmat ko‘rsatishimiz mumkin?” qabilidagi standart javoblar berilishi maqsadga muvofiq).
- Sanitariya-gigiyena tarmoqlari zamonaviy standartlarga javob berishi va soatma-soat tozalash tizimiga rioya qilinishi kerak. Hojatxona, vannaxonalar doimiy ravishda toza bo‘lishi kerak. Sovun, hojatxona qog‘ozi va boshqa sanitariya-gigiyena vositalari o‘z joyida bo‘lishi shart.
- ClickSmile SB bazasida xizmat sifati monitoringi va boshqaruvi tizimi yo‘lga qo‘yish kerak. Unda xizmat ko‘rsatish tizimini baholovchi “xursand bo‘ldim” yoki “qanoatlanmadim” tugmalari bo‘ladi. U Wi-Fi tizimi orqali yagona serverga beriladi. Keyin turli reytinglar ishlab chiqiladi. Qancha mijoz tashrif buyurgani va ulardan necha kishi xizmatlardan norozi bo‘lib ketgani bilinadi.
Izoh (0)