Давлат тест марказига Фельдегерлик хизмати томонидан махфийлиги ва дахлсизлигини таъминлаган ҳолда тест натижаларини Қорақалпоғистон Республикаси, вилоятлар ва Тошкент шаҳридан қайтариш 1 август куни соат 18:30 дан бошланди. Сўнгги материаллар Фарғона водийсидан кечаси 2:30 да етиб келди. Бу ҳақда Бош вазир ўринбосари Азиз Абдуҳакимов маълум қилди, дея хабар беради ЎзА.
Етиб келган тест натижалари бўйича дарҳол компьютер ёрдамида қайта ишлаш жараёни бошланади. Давлат тест марказининг ходимлари ташқарига чиқмасдан, телефон ва бошқа алоқа воситаларидан фойдаланмаган ҳамда тест материалларининг махфийлигини таъминлаган ҳолда тест материалларини қайта ишлайди.
Синовларнинг биринчи куни ижтимоий тармоқларда тест саволлари ташқарига чиқиб кетганлиги тўғрисидаги хабарлар тарқатилган. Ушбу ҳолатлар бўйича тегишли маълумотлар ҳуқуқий баҳо бериш учун ҳуқуқни муҳофаза қилувчи органларга берилди.
Шунингдек, айрим биноларда тест жараёнларини онлайн кузатиш учун қўйилган мониторлардаги тасвирларни узилиб қолиш ҳоллари ахборот технологиялари соҳасининг малакали мутахассислари томонидан зудлик билан бартараф этилди ва бундай ҳолатларга бошқа йўл қўймаслик чоралари кўрилди.
1 август кунги тест натижалари 2 август куннинг иккинчи ярмида Давлат тест маркази сайтида эълон қилинади.
Изоҳ (0)