Prezident Shavkat Mirziyoyev joriy yil 27-iyul kuni jinoyatchilikning oldini olishga bag‘ishlangan videoselektor yig‘ilishida Qibray tumani hokimi, uning o‘rinbosarlari, tuman prokurori, tuman IIB rahbari, tuman xotin-qizlar qo‘mitasi raisi va “Mahalla” jamg‘armasi tuman bo‘limi rahbarini lavozimdan ozod etishga ko‘rsatma bergandi. Bu haqda Toshkent viloyati hokimligi axborot xizmati ma’lum qildi.
Qibray tumanida 2009-yildan buyon hokimlik qilib kelgan Nig‘mat Muhamedov egallab turgan lavozimidan ozod etildi.
Xalq deputatlari tuman kengashining 31-iyul kuni bo‘lib o‘tgan navbatdan tashqari sessiyasida uning o‘rniga Olmaliq shahrida hokimlik qilib kelayotgan Mira’zam Mirqosimov tuman hokimi etib tayinlandi.
Mira’zam Mirqosimov 1975-yilda Toshkent shahrida tug‘ilgan. 1997-yil Toshkent irrigatsiya va qishloq xo‘jaligini mexanizatsiyalash muhandislari institutini, 2008-yil Prezident huzuridagi Davlat va jamiyat qurilishi akademiyasini bitirgan.
U 2011-2013 yillarda Shayxontohur tumani hokimining kommunal xo‘jalikni rivojlantirish, kommunikatsiyalar va obodonlashtirish masalalari bo‘yicha birinchi o‘rinbosari lavozimida ishlagan, keyinchalik Yunusobod tumaniga hokimlik qilgan.
Mira’zam Mirqosimov 2017-yil martida Toshkent shahrining Yunusobod tumani hokimligidan olingan va keyinchalik Olmaliq shahriga hokim etib tayinlangan edi.
Izoh (0)