“Navbahor” “Neftchi”ga, “Bunyodkor” esa “Qo‘qon-1912”ga yutqazib qo‘ydi, “Buxoro”da esa g‘alaba (video)

Bugun, 2-avgust sanasida futbol bo‘yicha O‘zbekiston Pepsi Superligasining 20-tur bahslariga yakunlandi.

Kunning dastlabki o‘yini Farg‘onada bo‘lib o‘tdi. Superliga autsayderi “Neftchi” o‘z maydonida “Navbahor”ni qabul qildi. Farg‘onaliklar safida Sherzod Hakimovv va Abdurahmon Abdulhaqov gol kiritgan bo‘lsa, “Navbahor”dan javob goliga Darko Nikach mualliflik qildi. Shu tariqa “Neftchi” 20-turga kelibgina mavsumdagi ilk g‘alabasini nishonladi.

Ikkinchi bellashuv Buxoroda kechadi. “Buxoro” o‘z uyida “Metallurg”ni mehmon qildi. Uchrashuv taqdiri ikkinchi bo‘limning 10 daqiqasida hal etildi. Avvaliga 55-daqiqada San’at Shixov buxoroliklarni hisobda oldinga olib chiqqan bo‘lsa, 63-daqiqada Islom Isoqjonov hisobni tenglashtirdi. 65-daqiqada esa Boburjon Omonov “Buxoro”ga g‘alaba keltirgan golga mualliflik qildi.

Turning so‘nggi o‘yini Toshkentda bo‘lib o‘tdi. Unda “Bunyodkor” “Qo‘qon-1912”ni qabul qildi. Uchrashuvning 14-daqiqasida Jasur Hakimov qo‘qonliklarni hisobda oldinga olib chiqdi. Oradan 13 daqiqa o‘tib, G‘iyos Komilov jamoasining ikkinchi golini kiritdi. 42-daqiqaga kelib, “Bunyodkor” himoyachisi Akrom Komilov hakam tomonidan ikkinchi sariq kartochkani olib, maydonni tark etdi. Ikkinchi bo‘limning 65-daqiqasida Javlon Ibrohimov penaltidan gol urib, hisobni qisqartirdi. Biroq 73-daqiqada Javohir Sidiqov “Qo‘qon-1912”ning 3-golini kiritib, jamoasining g‘alabasini ta’minladi.