«Навбаҳор» «Нефтчи»га, «Бунёдкор» эса «Қўқон-1912»га ютқазиб қўйди, «Бухоро»да эса ғалаба (видео)

Бугун, 2 август санасида футбол бўйича Ўзбекистон Pepsi Суперлигасининг 20-тур баҳсларига якунланди.

Куннинг дастлабки ўйини Фарғонада бўлиб ўтди. Суперлига аутсайдери «Нефтчи» ўз майдонида «Навбаҳор»ни қабул қилди. Фарғоналиклар сафида Шерзод Ҳакимовв ва Абдураҳмон Абдулҳақов гол киритган бўлса, «Навбаҳор»дан жавоб голига Дарко Никач муаллифлик қилди. Шу тариқа «Нефтчи» 20-турга келибгина мавсумдаги илк ғалабасини нишонлади.

Иккинчи беллашув Бухорода кечади. «Бухоро» ўз уйида «Металлург»ни меҳмон қилди. Учрашув тақдири иккинчи бўлимнинг 10 дақиқасида ҳал этилди. Аввалига 55-дақиқада Санъат Шихов бухороликларни ҳисобда олдинга олиб чиққан бўлса, 63-дақиқада Ислом Исоқжонов ҳисобни тенглаштирди. 65-дақиқада эса Бобуржон Омонов «Бухоро»га ғалаба келтирган голга муаллифлик қилди.

Турнинг сўнгги ўйини Тошкентда бўлиб ўтди. Унда «Бунёдкор» «Қўқон-1912»ни қабул қилди. Учрашувнинг 14-дақиқасида Жасур Ҳакимов қўқонликларни ҳисобда олдинга олиб чиқди. Орадан 13 дақиқа ўтиб, Ғиёс Комилов жамоасининг иккинчи голини киритди. 42-дақиқага келиб, «Бунёдкор» ҳимоячиси Акром Комилов ҳакам томонидан иккинчи сариқ карточкани олиб, майдонни тарк этди. Иккинчи бўлимнинг 65-дақиқасида Жавлон Иброҳимов пенальтидан гол уриб, ҳисобни қисқартирди. Бироқ 73-дақиқада Жавоҳир Сидиқов «Қўқон-1912»нинг 3-голини киритиб, жамоасининг ғалабасини таъминлади.