Joriy yilning oktabr oyida Argentinaning Buenos-Ayres shahrida III yozgi o‘smirlar Olimpiya o‘yinlari bo‘lib o‘tadi. O‘zbekiston sport delegatsiyasi musobaqaga jiddiy tayyorgarlik ko‘rmoqda, deb yozadi MOQ matbuot xizmati.
Xabarda qayd etilishicha, Xalqaro dzyudo federatsiyasining kadetlar o‘rtasidagi reyting musobaqalari yakuniy ro‘yxati e’lon qilindi.
Unga ko‘ra o‘g‘il bolalar o‘rtasida -66 kg vazn toifasida O‘zbekiston sharafini himoya qilgan Jayhunbek Nazarov, qizlar o‘rtasida esa -52 kg vazn toifasida bahslarda qatnashgan Nilufar Yermagembetova yakuniy reytingga ko‘ra o‘smirlar Olimpiadasida ishtirok etadigan bo‘ldi.
Ta’kidlanishicha, reyting musobaqalarida qatnashgan besh nafar o‘zbekistonlik yosh dzyudochi Olimpiya o‘yinlari me’yorini bajargan, biroq qoidaga ko‘ra bir mamlakatdan ko‘pi bilan ikki nafar dzyudochi o‘smirlar Olimpiadasida ishtirok etishi mumkin. O‘zbekiston dzyudo federatsiyasi qaroriga ko‘ra aynan Jayhunbek Nazarov va Nilufar Yermagambetova Argentinadagi musobaqada ishtirok etish uchun tanlab olindi.
Shu tariqa O‘zbekiston sport delegatsiyasining Buenos-Ayres Olimpiadasi uchun litsenziyalari soni 33 taga yetdi.
Bugungi kunga kelib III yozgi o‘smirlar Olimpiya o‘yinlari uchun O‘zbekiston terma jamoasi hisobida quyidagi sport turlarida litsenziyalar mavjud:
- Sport kurashlari – 5 ta
- Yengil atletika – 4 ta
- Boks – 3 ta
- Og‘ir atletika – 3 ta
- Baydarka va kanoeda eshkak eshish – 3 ta
- Akademik eshkak eshish – 3 ta
- Sport gimnastikasi – 2 ta
- Sport akrobatikasi – 2 ta
- Dzyudo – 2 ta
- Trampolin – 1 ta
- Badiiy gimnastika – 1 ta
- Ot sporti (konkur) – 1 ta
- Taekvondo – 1 ta
- Karate – 1
- O‘q otish – 1
Izoh (0)