Президент Шавкат Мирзиёев жорий йил 27 июль куни жиноятчиликнинг олдини олишга бағишланган видеоселектор йиғилишида Қибрай тумани ҳокими, унинг ўринбосарлари, туман прокурори, туман ИИБ раҳбари, туман хотин-қизлар қўмитаси раиси ва «Маҳалла» жамғармаси туман бўлими раҳбарини лавозимдан озод этишга кўрсатма берганди. Бу ҳақда Тошкент вилояти ҳокимлиги ахборот хизмати маълум қилди.
Қибрай туманида 2009 йилдан буён ҳокимлик қилиб келган Ниғмат Муҳамедов эгаллаб турган лавозимидан озод этилди.
Халқ депутатлари туман кенгашининг 31 июль куни бўлиб ўтган навбатдан ташқари сессиясида унинг ўрнига Олмалиқ шаҳрида ҳокимлик қилиб келаётган Мираъзам Мирқосимов туман ҳокими этиб тайинланди.
Мираъзам Мирқосимов 1975 йилда Тошкент шаҳрида туғилган. 1997-йил Тошкент ирригация ва қишлоқ хўжалигини механизациялаш муҳандислари институтини, 2008 йил Президент ҳузуридаги Давлат ва жамият қурилиши академиясини битирган.
У 2011-2013 йилларда Шайхонтоҳур тумани ҳокимининг коммунал хўжаликни ривожлантириш, коммуникациялар ва ободонлаштириш масалалари бўйича биринчи ўринбосари лавозимида ишлаган, кейинчалик Юнусобод туманига ҳокимлик қилган.
Мираъзам Мирқосимов 2017 йил мартида Тошкент шаҳрининг Юнусобод тумани ҳокимлигидан олинган ва кейинчалик Олмалиқ шаҳрига ҳоким этиб тайинланган эди.
Изоҳ (0)