AQShning Kaliforniya shtatida erkak Mega Millions lotereyasida 522 million dollar yutib oldi, deb yozmoqda “RBK”.
Kaliforniyalik erkak lotereyadagi 6 ta raqamning barchasini to‘g‘ri topgan, ya’ni jekpot yutgan. Bu AQSh lotereyasi tarixida yutuq hajmi bo‘yicha beshinchi o‘rindagi jekpotdir.
Lotereyaga qo‘yilgan pul yutug‘ining miqdori may oyida ko‘tarilishni boshladi. Iyun oyining o‘rtalarida yutuq 375 million dollarni, 21-iyul kuni 493 million dollarni tashkil qildi.
G‘olibning kimligi hozircha oshkor qilinmagan.
Baxtli chipta San-Xose shahridagi Ernie’s Liquors spirtli ichimliklar do‘konida sotilgan. Do‘kon ham yutuqsiz qolib ketmaydi. Jekpotli chipta sotilgan do‘konlarga 30 ming dollar mukofot puli beriladi.
Mega Millions lotereyasi tarixida eng katta yutuq (656 million dollar) 2012-yil 30-martda chiqqan. O‘shanda pul mukofotini Illinoys, Kanzas va Merilendda yashovchi uch kishi o‘zaro taqsimlab olgan.
Lotereya qoidalariga ko‘ra, yutuqni birdan to‘liq olishning iloji yo‘q. Agar g‘olib pullarni birdan olishga qaror qilsa, unga taxminan 320 million dollar beriladi. Bordi-yu, g‘olib yutuqning hammasini olmoqchi bo‘lsa, unga pullar qismlarga bo‘linib, 29 yil davomida to‘lab beriladi. Har ikki holatda ham lotereya yutug‘iga 39,6 foiz miqdorida soliq solinadi.
Mega Millions lotereyasi AQShning aksariyat shtatlari, jumladan, Virginiya orollarida o‘ynaladi.
Izoh (0)