АҚШнинг Калифорния штатида эркак Mega Millions лотереясида 522 миллион доллар ютиб олди, деб ёзмоқда «РБК».
Калифорниялик эркак лотереядаги 6 та рақамнинг барчасини тўғри топган, яъни жекпот ютган. Бу АҚШ лотереяси тарихида ютуқ ҳажми бўйича бешинчи ўриндаги жекпотдир.
Лотереяга қўйилган пул ютуғининг миқдори май ойида кўтарилишни бошлади. Июнь ойининг ўрталарида ютуқ 375 миллион долларни, 21 июль куни 493 миллион долларни ташкил қилди.
Ғолибнинг кимлиги ҳозирча ошкор қилинмаган.
Бахтли чипта Сан-Хосе шаҳридаги Ernie’s Liquors спиртли ичимликлар дўконида сотилган. Дўкон ҳам ютуқсиз қолиб кетмайди. Жекпотли чипта сотилган дўконларга 30 минг доллар мукофот пули берилади.
Mega Millions лотереяси тарихида энг катта ютуқ (656 миллион доллар) 2012 йил 30 мартда чиққан. Ўшанда пул мукофотини Иллинойс, Канзас ва Мэрилендда яшовчи уч киши ўзаро тақсимлаб олган.
Лотерея қоидаларига кўра, ютуқни бирдан тўлиқ олишнинг иложи йўқ. Агар ғолиб пулларни бирдан олишга қарор қилса, унга тахминан 320 миллион доллар берилади. Борди-ю, ғолиб ютуқнинг ҳаммасини олмоқчи бўлса, унга пуллар қисмларга бўлиниб, 29 йил давомида тўлаб берилади. Ҳар икки ҳолатда ҳам лотерея ютуғига 39,6 фоиз миқдорида солиқ солинади.
Mega Millions лотереяси АҚШнинг аксарият штатлари, жумладан, Виргиния оролларида ўйналади.
Изоҳ (0)