O‘zbekiston Respublikasi Prezidenti devoni va Adliya vazirligining mas’ul xodimlari tomonidan “Mirzo Ulug‘bek tumanida tajriba tariqasida davlat boshqaruvining alohida tartibini joriy etish to‘g‘risida”gi Kengash qarori loyihasi tayyorlandi va u Xalq deputatlari Mirzo Ulug‘bek tumani Kengashi tomonidan tasdiqlandi. Bu haqda “Daryo” manbasi xabar bermoqda.
Qarorga muvofiq tuman hokimining sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari lavozimini tugatildi hamda tuman hokimining kapital qurilish, obodonlashtirish va transport masalalari bo‘yicha o‘rinbosari, tuman hokimining uy-joy va kommunal xizmat ko‘rsatish masalalari bo‘yicha o‘rinbosari hamda tuman hokimi apparati rahbari lavozimlarini joriy etildi.
Tuman iqtisodiyot va kompleks rivojlantirish bo‘limi, tuman hokimligi moliya bo‘limi, tuman uy-joy kommunal xizmat ko‘rsatish bo‘limi va tuman qurilish bo‘limini tuman hokimi apparati tuzilmasiga kiritildi.
Mirzo Ulug‘bek tuman hokimi apparatining boshqaruv xodimlarining umumiy soni 79 nafardan iborat bo‘lgan tashkiliy tuzilmasi tasdiqlandi. Ta’kidlash kerakki, hokimlikning avvalgi tashkiliy tuzilmasida boshqaruv xodimlarining umumiy soni 23 nafarni tashkil etgan edi.
Tuman hokimi apparatining tasdiqlangan tashkiliy tuzilmasiga tuman byudjetining tasdiqlangan parametrlari doirasida Toshkent shahar hokimi bilan kelishilgan holda xalq deputatlari tuman Kengashi qarori bilan o‘zgartirish kiritilishi mumkinligi belgilab qo‘yildi.
Loyiha mualliflarining so‘zlariga ko‘ra, Mirzo Ulug‘bek tuman hokimiga tuman mahalliy budjeti daromadlari prognozining ortig‘i bilan bajarilgan qismi hisobidan tuman hokimi apparati hamda davlat boshqaruvi organlarining tuman bo‘limlari xodimlari lavozim maoshlariga, ular faoliyatini baholash natijalariga ko‘ra lavozim maoshining 200 foizigacha ustama belgilash huquqi berildi.
Bundan tashqari Xalq deputatlari Mirzo Ulug‘bek tumani Kengashi faoliyatini tashkiliy jihatdan ta’minlash maqsadida Kengashning doimiy asosda faoliyat yurituvchi 3 nafar xodimdan iborat Kengash kotibiyati tashkil qilindi.
Kotibiyat faoliyatiga Kengash a’zolari orasidan saylanadigan deputat –Kengash kotibi rahbarlik qiladi.
Mazkur qaror bilan mahalliy budjetga yo‘naltiriladiga bir qator qo‘shimcha tushumlar ham belgilab berildi.
Tuman hokimi va uning o‘rinbosarlari ishtirokida tuzilgan ko‘plab komissiyalar (kengashlar) tugatilib, ularning vazifa va funksiyalari tegishli davlat organlari zimmasiga yuklatildi.
Belgilangan bu kabi vazifalar Mirzo Ulug‘bek tumanidagi davlat hokimiyati organlari faoliyatini tubdan yaxshilash, hududdagi mavjud muammolarni hal qilishda ularning rolini oshirish, shuningdek 2017 – 2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini ijro etishga qaratilganligi bilan ahamiyatlidir.
Izoh (0)