Birinchi yarim yillikda O‘zbekistonda chet el kapitali ishtirokidagi 960 dan ortiq korxona ro‘yxatdan o‘tkazildi. Bosh vazir o‘rinbosari, Investitsiyalar bo‘yicha davlat qo‘mitasi raisi Suxrob Xolmurodov investitsiya takliflarini muhokama qilish yagona maydonchasining birinchi uchrashuvida shu haqda ma’lum qildi, deya xabar beradi “Gazeta.uz”.
Bu o‘tgan yilning shu davriga nisbatan uch barobarga ko‘p.
Qo‘mita rahbari so‘zlariga qaraganda, bu borada Rossiya, Turkiya, Xitoy, Qozog‘iston, Janubiy Koreya vakillari alohida faollik ko‘rsatmoqda. Afg‘oniston, Hindiston, Germaniya, Ukraina va Ozarbayjon investorlari qiziqish bildirmoqda.
Xalqaro moliya institutlari va chet el hukumat moliya tashkilotlari mablag‘larini jalb qilish sohasida faollashuv kuzatilmoqda.
“Yil boshidan buyon 1,5 milliard dollarlik qarz va kreditlarni jalb qilish to‘g‘risidagi bitimlar imzolandi”, — dedi bosh vazir o‘rinbosari.
U to‘g‘ridan-to‘g‘ri xorijiy sarmoyalarni jalb qilishda ijobiy natijalar qayd etilayotganini ma’lum qildi — O‘zbekiston hududlarida ular ishtirokida 280 dan ortiq loyihalar amalga oshirilmoqda.“Har hafta muhokama uchun yangi sohani tanlab olayapmiz, masalan neft-gaz, kimyo, to‘qimachilik. Biroq ulardan mustaqil ravishda investorlarni qiziqtiruvchi boshqa masalalar ham ko‘rib chiqiladi”, — dedi qo‘mita rahbari.
U barcha xohlovchilar — investorlar, diplomatik missiyalar vakillari, tadbirkor doiralar vakillari, OAV xodimlari, O‘zbekiston va chet el fuqarolarini muhokamalarda ishtirok etishga taklif qildi.Maydonchada vazirlik va mahkamalar, davlat birlashmalari rahbarlari, iqtisodiyot sohalariga javobgar mutasaddilar ular bilan muloqotga kirishadi.
Izoh (0)