Sherobod tumanidagi G‘ambur mahallasida yashovchi A.Sapiyev (ism-shariflar shartli) xususiy tadbirkorlik bilan shug‘ullanardi. Biroq u halol yo‘l bilan topayotgan rizqiga qanoat qilmadi, o‘zini uddaburon ko‘rsatib, mahalladoshlarini chuv tushurishni odat qildi, deya xabar beradi O‘zA.
Joriy yilda 49 yoshni qarshi olgan bu shaxs dastlab 2015-yil 16-yanvar kuni mahalladoshi M.Malikboyevani avrab, “yashab turgan uyingizga hokimlikdan qaror chiqartirib beraman”, deya 4 million 800 ming so‘m pulini qurtdek sanab oladi. O‘sha yili 14-aprel kuni G.Samadovaga fermerning ekin maydonidan 30 sotix yerda uy-joy qurish va yordamchi xo‘jalik yuritish uchun tuman hokimligidan qaror chiqartirib berishni va’da qilib, naqd 20 million so‘m puli, bir bosh otini olib ketadi.
2015-yil 20-may kuni R.Yog‘liyevning 10 million so‘mini cho‘ntakka urib, uni fermerning maydonidan yer ajrattirib, hokimlik qarorini chiqartirib berishga ishontiradi.
Qing‘ir yo‘l bilan pul topishning xumori kelib yurgan kech kuzda u yana bir mahalladoshini qarmoqqa ilintiradi. S.Tirkashevga ham uy-joy qurish maqsadida yer maydoni ajratish va hokimlik qarorini chiqartirib berish uchun 20 million so‘m pulini olib, juftakni rostlaydi.
Mahalladoshlar “uddaburon” A.Sapiyevning va’dalari quruq, puch ekanini to‘rt yil deganda anglab yetdi va sabru-bardoshi tugab, yaqinda tuman ichki ishlar bo‘limiga murojaat etadi.
Surxondaryo viloyat ichki ishlar boshqarmasi matbuot xizmatiga ko‘ra, firibgarlik yo‘li bilan boyishni maqsad qilgan bu shaxs endilikda qonun oldida javob beradi. Ayni paytda unga nisbatan Jinoyat Kodeksining tegishli moddasi bilan jinoyat ishi qo‘zg‘atilgan.
Izoh (0)