Toshkentning “Lokomotiv” jamoasi safiga bugunning o‘zida 3 nafar yangi o‘yinchi bilan boyidi. Bu haqda klub matbuot xizmati ma’lum qildi.
“Temiryo‘lchilar” safiga O‘zbekiston milliy terma jamoasi a’zolari —Temurxo‘ja Abduholiqov, Anzur Ismoilov erkin agent sifatida kelib qo‘shilgan. Shuningdek, rossiyalik taniqli hujumchi Pavel Pogrebnyakning ukasi Nikolay Pogrebnyak ham poytaxt jamoasi safida to‘p suradigan bo‘ldi.
Quyida “Lokomotiv”ning yangi futbolchilari haqida batafsilroq ma’lumotlar bilan tanishingiz mumkin:
Anzur Ismoilov
Bo‘yi: 190 sm
Og‘irligi: 83 kg
Ampluasi: himoyachi
1985-yil Samarqand shahrida tavallud topgan. O‘z faoliyatini Samarqandning “Dinamo” klubida boshlagan. 2002—2003-yilgi mavsumni sobiq “Traktor” jamoasida o‘tkazgan. 2003-yilgi mavsumdan boshlab esa poytaxtning boshqa bir jamoasi “Paxtakor” safiga borib qo‘shilgan. 6 yil “Paxtakor” safida to‘p surgan futbolchi 2010-yil “Bunyodkor” klubi bilan shartnoma imzolagan va klub sharafini 1 yil himoya qilgan. 2011-yildan boshlab esa legioner futbolchi maqomini olgan Anzur Ismoilov Xitoyning “Chanchun Yatay” klubiga borib qo‘shilgan. 7 yil davomida himoyachi xitoyliklar safida 186 marta maydonga tushib 12 marta raqiblar darvozasini nishonga olgan. 2007-yildan beri Anzur Ismoilov 82 marta O‘zbeksiton milliy terma jamoasi libosida maydonga tushgan. Futbolchi bilan ikki yillik shartnoma imzolandi.
Temurxo‘ja Abduholiqov
Bo‘yi: 187 sm
Og‘irligi: 87 kg
Ampluasi: hujumchi
Temurxo‘ja 1991-yil Toshkent shahrida tavallud topgan. Professional futbolda dastlabki o‘yinini 2009-yil “Bunyodkor” klubi safida boshlagan. “Qaldirg‘ochlar” safida 3 mavsum o‘tkazgan hujumchi 2011-yil “Paxtakor” safiga borib qo‘shilgan. “Sherlar” safida ham uch mavsum o‘tkazgan Temurxo‘ja 64 ta o‘yinda maydonga tushib 22 ta gol kiritishgan muvaffaq bo‘lgan. 2014-yil mavsumi yakunlangan u Xorvatiyaning “Xayduk” jamoasiga o‘tgan. Oradan bir yil o‘tib 2015- yil “temiryo‘lchilar” bilan shartnoma imzolagan. “Lokomotiv” safida Temurxo‘ja O‘zbekiston vitse-chempioni, O‘zbekiston Kubogi, O‘zbekiston chempioni va O‘zbekiston Superkubogi sohibi bo‘ldi. 2016-yil mavsumning eng yaxshi to‘purari unvonini qo‘lga kiritgan. 2017-yil esa hujumchi Qatarning “Al-Sayliya” klubi safiga o‘tadi. Qatar Superligasida 17 ta uchrashuvda maydonga tushib, raqiblar darvozasiga 11 ta gol urgan.
Nikolay Pogrebnyak
Bo‘yi: 185 sm
Og‘irligi: 77 kg
Ampluasi: himoyachi
1992-yil Moskvada tug‘ilgan Nikolay dastlabki faoliyatini “Timiryazeves” maktabida boshlagan. 2010-yildan professional karyerasini Tomsk shahrining “Tom” jamoasida boshlagan. 2015—2016-yillarda Moskvaning “Torpedo”, Stavropol shahrining “Dinamo” jamoalari safida to‘p surgan. Faoliyati davomida hujumchi, yarim himoyachi va himoyachi pozitsiyalarida harakat qilgan.
Nikolay Rossiya terma jamoasining mashhur sobiq futbolchisi Pavel Pogrebnyakning ukasi hisoblanadi.
Izoh (0)