Тошкентнинг «Локомотив» жамоаси сафига бугуннинг ўзида 3 нафар янги ўйинчи билан бойиди. Бу ҳақда клуб матбуот хизмати маълум қилди.
«Темирйўлчилар» сафига Ўзбекистон миллий терма жамоаси аъзолари —Темурхўжа Абдуҳолиқов, Анзур Исмоилов эркин агент сифатида келиб қўшилган. Шунингдек, россиялик таниқли ҳужумчи Павел Погребнякнинг укаси Николай Погребняк ҳам пойтахт жамоаси сафида тўп сурадиган бўлди.
Қуйида «Локомотив»нинг янги футболчилари ҳақида батафсилроқ маълумотлар билан танишингиз мумкин:
Анзур Исмоилов
Бўйи: 190 см
Оғирлиги: 83 кг
Амплуаси: ҳимоячи
1985 йил Самарқанд шаҳрида таваллуд топган. Ўз фаолиятини Самарқанднинг «Динамо» клубида бошлаган. 2002—2003 йилги мавсумни собиқ «Трактор» жамоасида ўтказган. 2003 йилги мавсумдан бошлаб эса пойтахтнинг бошқа бир жамоаси «Пахтакор» сафига бориб қўшилган. 6 йил «Пахтакор» сафида тўп сурган футболчи 2010 йил «Бунёдкор» клуби билан шартнома имзолаган ва клуб шарафини 1 йил ҳимоя қилган. 2011 йилдан бошлаб эса легионер футболчи мақомини олган Анзур Исмоилов Хитойнинг «Чанчун Ятай» клубига бориб қўшилган. 7 йил давомида ҳимоячи хитойликлар сафида 186 марта майдонга тушиб 12 марта рақиблар дарвозасини нишонга олган. 2007 йилдан бери Анзур Исмоилов 82 марта Ўзбекситон миллий терма жамоаси либосида майдонга тушган. Футболчи билан икки йиллик шартнома имзоланди.
Темурхўжа Абдуҳолиқов
Бўйи: 187 см
Оғирлиги: 87 кг
Амплуаси: ҳужумчи
Темурхўжа 1991 йил Тошкент шаҳрида таваллуд топган. Профессионал футболда дастлабки ўйинини 2009 йил «Бунёдкор» клуби сафида бошлаган. «Қалдирғочлар» сафида 3 мавсум ўтказган ҳужумчи 2011 йил «Пахтакор» сафига бориб қўшилган. «Шерлар» сафида ҳам уч мавсум ўтказган Темурхўжа 64 та ўйинда майдонга тушиб 22 та гол киритишган муваффақ бўлган. 2014 йил мавсуми якунланган у Хорватиянинг «Хайдук» жамоасига ўтган. Орадан бир йил ўтиб 2015- йил «темирйўлчилар» билан шартнома имзолаган. «Локомотив» сафида Темурхўжа Ўзбекистон вице-чемпиони, Ўзбекистон Кубоги, Ўзбекистон чемпиони ва Ўзбекистон Суперкубоги соҳиби бўлди. 2016 йил мавсумнинг энг яхши тўпурари унвонини қўлга киритган. 2017 йил эса ҳужумчи Қатарнинг «Ал-Сайлия» клуби сафига ўтади. Қатар Суперлигасида 17 та учрашувда майдонга тушиб, рақиблар дарвозасига 11 та гол урган.
Николай Погребняк
Бўйи: 185 см
Оғирлиги: 77 кг
Амплуаси: ҳимоячи
1992 йил Москвада туғилган Николай дастлабки фаолиятини «Тимирязевец» мактабида бошлаган. 2010 йилдан профессионал карьерасини Томск шаҳрининг «Том» жамоасида бошлаган. 2015—2016 йилларда Москванинг «Торпедо», Ставропол шаҳрининг «Динамо» жамоалари сафида тўп сурган. Фаолияти давомида ҳужумчи, ярим ҳимоячи ва ҳимоячи позицияларида ҳаракат қилган.
Николай Россия терма жамоасининг машҳур собиқ футболчиси Павел Погребнякнинг укаси ҳисобланади.
Изоҳ (0)