2018-yil 2-iyul kuni Toshkent shahrining Mirzo Ulug‘bek tumanida joylashgan O‘zbekiston Respublikasi Soliq qo‘mitasi sport kompleksi stadionida Amerika—Ispaniya futboli akademiyasi (AIFA) ochilishi bo‘lib o‘tadi. Bu haqda tashkilotchilar “Daryo”ga ma’lum qildi.
Loyiha maqsadi O‘zbekistonda sport turizmini rivojlantirish, yosh futbolchilarni loyiha hamkorlari mamlakatlari — AQSh, Ispaniya, Braziliya, Venesuela, Kolumbiya va Argentina futbol klublarining professional usullari asosida har tomonlama tayyorlash va qo‘llab-quvvatlash, AIFA o‘smirlarining xalqaro musobaqalarda ishtirok etishiga yordamlashish, futbol bo‘yicha milliy terma jamoa uchun sport zahirasini tayyorlash, sport targ‘iboti va yoshlarning intellektual jihatdan rivojlanishiga ko‘maklashishdan iborat.
AIFA loyihasi o‘zbekistonlik ishbilarmon, “GoUzbekTour.com” va “UzbekistanTurismo.com” turkompaniyalari asoschisi, AQSh (Orlando, Florida shtati)dagi Futbol akademiyasi hamkori Shuhrat Qosimov, O‘zbekiston Respublikasi Turizmni rivojlantirish davlat qo‘mitasi va “Intour Travel” MChJ kompaniyasi qo‘llab-quvvatlashi ostida amalga oshirilmoqda.
Loyiha tashkilotchilari barcha istovchi bolalarga jahon miqyosida professional futbol bilan shug‘ullanish, o‘smirlar orasidagi xalqaro turnirlar hamda jahon futboli yulduzlarining mahorat darslarida ishtirok etish va mazkur loyiha hamkor mamlakatlarining diqqatga sazovor maskanlarini ko‘rish imkonini yaratadi.
Dastlabki bosqichda AIFAga bolalarni jalb qilish va o‘rgatish Toshkent shahrining barcha tumanlaridagi sport seksiyalarida olib boriladi. Ularda 4 yoshdan 17 yoshgacha bo‘lgan barcha bolalar ishtirok etishlari mumkin. Ilk uch oyda o‘zbekistonlik murabbiylar mashg‘ulotlarni AQShdagi Futbol akademiyasi asoschilari Nelson Veles va Gustavo Jeremillo tomonidan ishlab chiqilgan maxsus dastur asosida olib borishadi. Keyingi oylarda mashg‘ulotlarni loyihaning hamkor mamlakatlari — AQSh, Ispaniya, Braziliya, Kolumbiya, Venesuela, Argentina professional klublarining taklif qilingan murabbiylari o‘tkazadi.
Izoh (0)