2018 йил 2 июль куни Тошкент шаҳрининг Мирзо Улуғбек туманида жойлашган Ўзбекистон Республикаси Солиқ қўмитаси спорт комплекси стадионида Америка—Испания футболи академияси (AIFA) очилиши бўлиб ўтади. Бу ҳақда ташкилотчилар «Дарё»га маълум қилди.
Лойиҳа мақсади Ўзбекистонда спорт туризмини ривожлантириш, ёш футболчиларни лойиҳа ҳамкорлари мамлакатлари — АҚШ, Испания, Бразилия, Венесуэла, Колумбия ва Аргентина футбол клубларининг профессионал усуллари асосида ҳар томонлама тайёрлаш ва қўллаб-қувватлаш, AIFA ўсмирларининг халқаро мусобақаларда иштирок этишига ёрдамлашиш, футбол бўйича миллий терма жамоа учун спорт заҳирасини тайёрлаш, спорт тарғиботи ва ёшларнинг интеллектуал жиҳатдан ривожланишига кўмаклашишдан иборат.
AIFA лойиҳаси ўзбекистонлик ишбилармон, «GoUzbekTour.com» ва «UzbekistanTurismo.com» туркомпаниялари асосчиси, АҚШ (Орландо, Флорида штати)даги Футбол академияси ҳамкори Шуҳрат Қосимов, Ўзбекистон Республикаси Туризмни ривожлантириш давлат қўмитаси ва «Intour Travel» МЧЖ компанияси қўллаб-қувватлаши остида амалга оширилмоқда.
Лойиҳа ташкилотчилари барча истовчи болаларга жаҳон миқёсида профессионал футбол билан шуғулланиш, ўсмирлар орасидаги халқаро турнирлар ҳамда жаҳон футболи юлдузларининг маҳорат дарсларида иштирок этиш ва мазкур лойиҳа ҳамкор мамлакатларининг диққатга сазовор масканларини кўриш имконини яратади.
Дастлабки босқичда AIFA’га болаларни жалб қилиш ва ўргатиш Тошкент шаҳрининг барча туманларидаги спорт сексияларида олиб борилади. Уларда 4 ёшдан 17 ёшгача бўлган барча болалар иштирок этишлари мумкин. Илк уч ойда ўзбекистонлик мураббийлар машғулотларни АҚШдаги Футбол академияси асосчилари Нельсон Велес ва Густаво Жеремилло томонидан ишлаб чиқилган махсус дастур асосида олиб боришади. Кейинги ойларда машғулотларни лойиҳанинг ҳамкор мамлакатлари — АҚШ, Испания, Бразилия, Колумбия, Венесуэла, Аргентина профессионал клубларининг таклиф қилинган мураббийлари ўтказади.
Изоҳ (0)