Joriy yil 28—29-iyun kunlari Toshkent shahridagi Inha universitetida bo‘lib o‘tadigan “O‘zbekiston 2035” forumida mamlakatni rivojlantirishning istiqbolli strategiyasi muhokama qilinadi. Bu haqda O‘zA xabar bermoqda.
Tadbir “Buyuk kelajak” xalqaro nodavlat notijorat tashkiloti hamda “Taraqqiyot strategiyasi” markazi tomonidan tashkil etilmoqda. Unda turli vazirlik va idoralar mutasaddilari, ilmiy markazlar mutaxassislari, diplomatik korpus vakillari hamda xalqaro ekspertlar ishtiroki kutilmoqda.
Forumda davlat va jamiyat boshqaruvi tizimida demokratik islohotlarni chuqurlashtirish, aholi yashash darajasi va ijtimoiy muhofazani kuchaytirish, qishloq xo‘jaligi, sanoat, issiqlik va elektr energiyasi majmuasi, infratuzilmani rivojlantirish, moliyaviy soha, innovatsiyalar, o‘rta va kichik tadbirkorlikni rivojlantirish, ilm-fan, turizm, madaniyat, ta’lim va inson kapitali kabi sohalardagi mavjud muammolar muhokama etiladi.
“Buyuk kelajak” tashkiloti O‘zbekistonda tug‘ilib, turli sabablarga ko‘ra xorijda yashayotgan, tahsil olayotgan va mehnat qilayotgan o‘zbekistonliklar tomonidan tashkil etilib, joriy yil aprel oyida O‘zbekiston Respublikasi Adliya vazirligida xalqaro nodavlat notijorat tashkilot sifatida ro‘yxatdan o‘tkazilgan.
Izoh (0)