Samarqandda 19—23-iyun kunlari umumta’lim maktablarining 10—11-sinf o‘quvchilari o‘rtasida fizika va astronomiya fanlari bo‘yicha o‘tkazilgan Mirzo Ulug‘bek nomidagi xalqaro olimpiada g‘oliblari taqdirlandi, deb xabar beradi O‘zA.
Prezident tashabbusi bilan tashkil etilgan mazkur nufuzli xalqaro tanlovda O‘zbekiston, Rossiya, Belarus, Yaponiya, Qozog‘iston, Qirg‘iziston va Turkmanistondan vakillar ishtirok etdi. Ilk bor o‘tkazilgan xalqaro olimpiadada ushbu mamlakatlarning 45 iqtidorli o‘quvchisi bilimini sinovdan o‘tkazdi.
O‘zbekiston Respublikasi Xalq ta’limi vazirligi, Samarqand viloyati hokimligi va olimpiada hakamlar hay’ati vakillari mazkur tanlov birinchi marta o‘tkazilayotgan bo‘lsa-da, unga qiziqish yuqori bo‘lgani hamda barcha jarayonlar yuksak saviyada tashkil etilganini ta’kidladi.
“Tanlovda eng iqtidorli o‘quvchilar barcha sinovlarda faol qatnashganiga amin bo‘ldim. Ularning ishlarini nufuzli hakamlar hay’ati munosib baholab bordi. Shubhasiz, eng bilimlilar g‘olib bo‘ldi. Xalqaro olimpiadaga Samarqandda katta hozirlik ko‘rilgan ekan. Tadbir doirasida shahar bo‘ylab uyushtirilgan sayohatlar, turli madaniy tadbirlar, uchrashuvlar taassurotlarga boy bo‘ldi”, — deydi Xalqaro fizika olimpiadalari bo‘yicha bosh hakam, Moskva davlat texnika instituti kafedra mudiri o‘rinbosari D.Aleksandrov.
Ikki bosqichda o‘tkazilgan olimpiada natijalariga ko‘ra, fizika fanidan O‘zbekiston jamoasi a’zosi, Namangan davlat universiteti akademik-litseyi o‘quvchisi Umidjon Hafizov oltin medalni qo‘lga kiritdi. Qirg‘izistonlik Temur Tinichbekov, qozog‘istonlik Islam Amangeldi va o‘zbekistonlik o‘quvchilar Otabek Hasanov hamda Abdurahmon Nosirov kumush medalga sazovor bo‘ldi. Ushbu fan bo‘yicha yana olti nafar ishtirokchi bronza medali bilan taqdirlandi.
Astronomiya fani bo‘yicha bahslarda Qirg‘iziston respublikasi Bishkek shahridagi fizika-matematika fanlariga ixtisoslashtirilgan maktab o‘quvchisi Iriskeldi Anarbekov oltin medalni qo‘lga kiritdi. Qozog‘iston jamoasi a’zosi Janibek Amankul kumush medal, o‘zbekistonlik Do‘stmamat Bozorqulov va qozog‘istonlik Yerjan Kenes bronza medalga sazovor bo‘ldi.
“Xalqaro olimpiadada g‘olib bo‘lganimdan juda xursandman. Buning uchun, avvalo, ustozlarimdan minnatdorman. Tanlov davomida xorijiy davlatlardan kelgan tengdoshlarim bilan tanishib, o‘zaro fikr almashdik. Ularga yurtimizdan yetishib chiqqan buyuk allomalar haqida gapirib berdim”, — deydi Namangan davlat universiteti akademik-litseyi o‘quvchisi U.Hafizov.
Olimpiadada O‘zbekiston vakillari jami 6 ta, qozog‘istonliklar 5 ta, qirg‘izistonliklar 3 ta va turkmanistonliklar 1 ta medalga sazovor bo‘ldi.
Mirzo Ulug‘bek nomidagi xalqaro olimpiadani har ikki yilda an’anaviy tarzda Samarqandda o‘tkazish rejalashtirilgan.
Izoh (0)