2004-yilda Xitoyda 2300 yil avvalgi tarixga tegishli qabr topilgandi. Unda odamga tegishli jasaddan tashqari, hayvonlar suyaklari ham bo‘lgan, bu esa ajoyib kashfiyotni amalga oshirish imkonini berdi.
Xitoyning birinchi imperatori bilan qarindosh bo‘lgan aslzoda ayolning qabri Xitoyning Shansi provinsiyasidan topildi, deya xabar bermoqda National Geographic. Ayol imperatorning buvisi bo‘lgani taxmin etilmoqda.
Marhumaning oliy nasabga tegishli ekanligini bildirish uchun qabrga nefrit, oltin va kumush buyumlarni, shuningdek, qurbonlikka keltirilgan turli jonivorlarni qo‘yishgan.
12 ta chuqurda otlar, Osiyo qo‘ng‘ir ayig‘i, qoplon, turna qoldiqlari hamda gibbon deb taxmin etilayotgan maymun bosh suyagining bir qismi aniqlandi.
Maymun suyagi tahlil qilinganida u qadimiy hayvon qoldig‘i ekanligi aniqlandi. Ko‘rinishidan ham u hozirgi turlardan farq qilishi ma’lum edi, yirikroq tishlari va past peshonasi tufayli.
Ayni paytda gibbonlar Xitoy hududida deyarli uchramaydi, ammo qadimiy Xitoyda maymunlar dono jonivorlar sifatida hurmat qilingan. Topilma bu yerda minglab yillar avval yashagan turlardan biri haqida bilib olish imkonini beradi.
Izoh (0)