2004 йилда Хитойда 2300 йил аввалги тарихга тегишли қабр топилганди. Унда одамга тегишли жасаддан ташқари, ҳайвонлар суяклари ҳам бўлган, бу эса ажойиб кашфиётни амалга ошириш имконини берди.
Хитойнинг биринчи императори билан қариндош бўлган аслзода аёлнинг қабри Хитойнинг Шаньси провинциясидан топилди, дея хабар бермоқда National Geographic. Аёл императорнинг бувиси бўлгани тахмин этилмоқда.
Марҳуманинг олий насабга тегишли эканлигини билдириш учун қабрга нефрит, олтин ва кумуш буюмларни, шунингдек, қурбонликка келтирилган турли жониворларни қўйишган.
12 та чуқурда отлар, Осиё қўнғир айиғи, қоплон, турна қолдиқлари ҳамда гиббон деб тахмин этилаётган маймун бош суягининг бир қисми аниқланди.
Маймун суяги таҳлил қилинганида у қадимий ҳайвон қолдиғи эканлиги аниқланди. Кўринишидан ҳам у ҳозирги турлардан фарқ қилиши маълум эди, йирикроқ тишлари ва паст пешонаси туфайли.
Айни пайтда гиббонлар Хитой ҳудудида деярли учрамайди, аммо қадимий Хитойда маймунлар доно жониворлар сифатида ҳурмат қилинган. Топилма бу ерда минглаб йиллар аввал яшаган турлардан бири ҳақида билиб олиш имконини беради.
Изоҳ (0)