Ijtimoiy tarmoqlarning O‘zbekiston segmenti va o‘zbek internet-nashrlarida 19 iyun kuni Urganch tumani prokurori D.Madirimovning ko‘rsatmasi aks etgan xat surati tarqalgan edi.
Xatda tuman prokurori, “Qozog‘istonning Olmaota shahrida 3—12 yosh oralig‘idagi 12 nafar bola 10 turdagi dori vositalari (Amoksitsillin, Kapesula, Ibuprofen suspenziya, Alklofenak, Sumamed, Ingalipt, Antisept, Inflyutsid, Panadol (bolalar uchun), Sanasol)ni qabul qilish oqibatida vafot etgani munosabati bilan”, Urganch tuman tibbiyot birlashmasi rahbariyati va “Xorazm dori-darmon” kompaniyasi raisiga ro‘yxat bo‘yicha dori vositalarini sotuvdan olish choralarini ko‘rish haqida ko‘rsatma bergan.
Xorazm viloyat prokuraturasidan ma’lum qilishlaricha, Urganch tuman prokurori D.Madirimovning ushbu xatidagi ifoda noaniq bo‘lib, o‘z navbatida bu holat noto‘g‘ri mazmundagi turli noto‘g‘ri izohlarning kelib chiqishiga sabab bo‘lgan. “Ushbu xat ichki idoraviy xarakterda bo‘lib, jamoatchilik e’tiboriga havola etishga mo‘ljallanmagan edi”, — deyiladi hududiy idora axborotida.
Mazmunining noaniqligi sabab ushbu xat hozirgi vaqtda hech qanday yuridik kuchga ega emas. Shuningdek, prokuror D.Madirimovning ushbu ko‘rsatmasi bo‘yicha dori vositalarini sotuvdan olib qo‘yish bo‘yicha ham hech qanday choralar ko‘rilmagan.
“Xorazm viloyat prokuraturasi internet-resurslar va ijtimoiy tarmoqlarda noaniq axborot tarqalishi oqibatida tushunmovchilikka uchragan fuqarolardan chin ko‘ngildan uzr so‘raydi. Hozirgi vaqtda Urganch tuman prokurori D.Madirimovga nisbatan xizmat tekshiruvi olib borilmoqda, tekshiruv yakunlariga ko‘ra unga nisbatan tegishli jazo choralari ko‘riladi”, — deyiladi Xorazm viloyati prokuraturasi axborotida.
Ma’lumot uchun, prokuror D.Madirimovning xatiga asos bo‘lgan “Qozog‘istondagi voqea” aslida bo‘lmagan; bunday xabarlar Qozog‘istonning tegishli davlat organlari tomonidan rad ham etilgan. Ayni vaqtda, xuddi shunday mazmundagi xabarlar Rossiya, Ukraina, Ozarbayjon kabi davlatlarda ham tarqalgan. Har safar mamlakatlarning u yoki bu shaharlaridagi 3—12 yosh oralig‘idagi 12 nafar bola aynan 10 ta dori vositasidan halok bo‘lgani aytilgan.
Izoh (0)