Хоразм вилояти прокуратураси интернетда ваҳима келтириб чиқарган хат бўйича тушунтириш берди

Ижтимоий тармоқларнинг Ўзбекистон сегменти ва ўзбек интернет-нашрларида 19 июнь куни Урганч тумани прокурори Д.Мадиримовнинг кўрсатмаси акс этган хат сурати тарқалган эди.

Хатда туман прокурори, «Қозоғистоннинг Олмаота шаҳрида 3—12 ёш оралиғидаги 12 нафар бола 10 турдаги дори воситалари (Амоксициллин, Капесула, Ибупрофен суспензия, Алклофенак, Сумамед, Ингалипт, Антисепт, Инфлюцид, Панадол (болалар учун), Санасол)ни қабул қилиш оқибатида вафот этгани муносабати билан», Урганч туман тиббиёт бирлашмаси раҳбарияти ва «Хоразм дори-дармон» компанияси раисига рўйхат бўйича дори воситаларини сотувдан олиш чораларини кўриш ҳақида кўрсатма берган.

Хоразм вилоят прокуратурасидан маълум қилишларича, Урганч туман прокурори Д.Мадиримовнинг ушбу хатидаги ифода ноаниқ бўлиб, ўз навбатида бу ҳолат нотўғри мазмундаги турли нотўғри изоҳларнинг келиб чиқишига сабаб бўлган. «Ушбу хат ички идоравий характерда бўлиб, жамоатчилик эътиборига ҳавола этишга мўлжалланмаган эди», — дейилади ҳудудий идора ахборотида.

Мазмунининг ноаниқлиги сабаб ушбу хат ҳозирги вақтда ҳеч қандай юридик кучга эга эмас. Шунингдек, прокурор Д.Мадиримовнинг ушбу кўрсатмаси бўйича дори воситаларини сотувдан олиб қўйиш бўйича ҳам ҳеч қандай чоралар кўрилмаган.

«Хоразм вилоят прокуратураси интернет-ресурслар ва ижтимоий тармоқларда ноаниқ ахборот тарқалиши оқибатида тушунмовчиликка учраган фуқаролардан чин кўнгилдан узр сўрайди. Ҳозирги вақтда Урганч туман прокурори Д.Мадиримовга нисбатан хизмат текшируви олиб борилмоқда, текширув якунларига кўра унга нисбатан тегишли жазо чоралари кўрилади», — дейилади Хоразм вилояти прокуратураси ахборотида.

Маълумот учун, прокурор Д.Мадиримовнинг хатига асос бўлган «Қозоғистондаги воқеа» аслида бўлмаган; бундай хабарлар Қозоғистоннинг тегишли давлат органлари томонидан рад ҳам этилган. Айни вақтда, худди шундай мазмундаги хабарлар Россия, Украина, Озарбайжон каби давлатларда ҳам тарқалган. Ҳар сафар мамлакатларнинг у ёки бу шаҳарларидаги 3—12 ёш оралиғидаги 12 нафар бола айнан 10 та дори воситасидан ҳалок бўлгани айтилган.