Toshkent shahridagi Wyndham mehmonxonasida Investitsiyalar bo‘yicha davlat qo‘mitasi va Ispaniya investitsiya va eksport agentligi (ICEX) tomonidan O‘zbekiston — Ispaniya biznes-forumi o‘tkazilmoqda. Bu haqda O‘zA xabar berdi.
Tadbirda Ispaniyaning mamlakatdagi Favqulodda va muxtor elchisi Ignasio Ibanesa, O‘zbekiston savdo-sanoat palatasi raisi Adham Ikromov, Ispaniya investitsiya va eksport agentligi — ICEX bosh direktori Fransisko Xavyer Serra, Investitsiyalar bo‘yicha davlat qo‘mitasi raisi birinchi o‘rinbosari Laziz Qudratov so‘zga chiqdi.
Forumni o‘tkazishdan ko‘zda tutilgan maqsad O‘zbekiston bilan Ispaniya o‘rtasida energetika, transport infratuzilmalari, shahar suv ta’minoti va sanitariya tizimlari, qattiq chiqindilarni boshqarish, qurilish, oziq-ovqat sanoati va injiniring xo‘jaligi kabi sohalarda ishbilarmonlik aloqalarini mustahkamlash, ispaniyalik tadbirkorlar uchun interfaol platforma yaratishdir. Ushbu platformada tomonlar savdo-iqtisodiy, sarmoyaviy hamkorlikni rivojlantirishga oid takliflarni muhokama etadi.
Ushbu biznes-forumda Ispaniyaning 20 ga yaqin kompaniyasi ishtirok etmoqda. O‘zbekiston bozorida munosib joy egallashni ko‘zlagan Ispaniya kompaniyalari soni yanada ko‘paygan. Ular energetika, qishloq xo‘jaligi, qattiq maishiy chiqindilarni qayta ishlash kabi sohalarda Yevropa miqyosida yetakchilar qatorida turadi.
Forumning o‘tkazilishi yaqin orada qo‘shma hukumatlararo komissiyasining birinchi majlisini tashkil etishga tayyorgarlik vazifasini ham o‘taydi.
O‘zbekiston — Ispaniya biznes-forumi davom etmoqda.
Izoh (0)