Donald Tramp va Kim Chen In Singapurda 12-iyun kuni tongda tarixdagi ilk AQSh va KXDR sammiti doirasida uchrashdi. Bu haqda “RIA Novosti” xabar bermoqda.
Sammit Singapurning boshqa qismidan ko‘prik bilan ajralgan Sentosa kurort orolidagi “Kapella” mehmonxonasida bo‘lib o‘tmoqda. Uchrashuv oldidan ikki davlat yetakchilari kameralar oldida bir-biri bilan qo‘l berib ko‘rishdi.
Birga-bir shaklidagi suhbat, rejalashtirilganidek, 45 daqiqa davom etdi. AQSh prezidenti muzokaralar “juda yaxshi” o‘tgani va “katta muammolar”ni hal etish imkoni tug‘ilganini bildirdi. Shimoliy Koreya yetakchisi bilan munosabatlarini esa “ajoyib” deya baholadi.
O‘z navbatida, Kim Chen In ham Tramp bilan tig‘iz hamkorlikdan manfaatdor ekanligini qayd etdi.
Yuzma-yuz muloqotdan so‘ng kengaytirilgan tarkibdagi sammit boshlandi. Unda Koreya yarim orolini yadro qurolidan xoli etish va tinchlik kafolatlari, AQSh va Shimoliy Koreya munosabatlarini izga solish masalalari muhokama etilishi kutilmoqda.
Qandaydir hujjatlar imzolanishi ko‘zda tutilmagan. Trampga ko‘ra, mazkur uchrashuvning maqsadi “jarayonni boshlab olish”dan iborat.
Izoh (0)