Samarqand viloyatida diniy ekstremizm g‘oyalari ta’siriga tushib qolgan 241 nafar shaxs qidiruvga berilgandi. Bu haqda “Zarafshon” gazetasi ma’lum qildi.
So‘nggi 5 oy ichida oila a’zolari bilan o‘tkazilgan targ‘ibot va tezkor qidiruv tadbirlari natijasida ularning 15 nafari yashash manzillariga qaytarildi. 13 kishi avf etildi.
Bu haqda Samarqand shahrida o‘tkazilgan “Biz diniy ekstremizm va terrorizmga qarshimiz” mavzusidagi davra suhbatida aytib o‘tildi.
Qayd etilishicha, viloyatda diniy ekstremizm g‘oyalari ta’siriga tushib qolib, maxsus hisobda turgan 1 623 fuqaro ro‘yxatdan chiqarildi. Joriy yilning o‘tgan davrida diniy ekstremizm va terrorizm bilan bog‘liq 11 ta jinoyat aniqlanib, 12 kishiga nisbatan jinoiy ish qo‘zg‘atildi.
Ularning 8 nafari pul topish maqsadida xorijga borib, internet orqali ekstremistik guruhga qo‘shilgan, 4 nafari esa diniy aqidaparastlikni targ‘ib qilgan. Tadbirda ularning bunday ishlarga qo‘l urishiga oila va mahallasidagi muhit, ishsizlik va boshqa omillar sabab bo‘lgani ta’kidlandi.
Izoh (0)