O‘zbekistonda joriy yil 1-iyulgacha Innovatsion rivojlanish strategiyasi ishlab chiqiladi

Innovatsion rivojlanish vazirligi va BMT Taraqqiyot Dasturi hamkorligida “O‘zbekistonning innovatsion rivojlanishda tanlagan yo‘li” mavzusida davra suhbati o‘tkazildi. Bu haqda O‘zA xabar bermoqda.

Unda O‘zbekistonning innovatsion taraqqiyoti yo‘nalishlarini aniqlab beruvchi asosiy hujjatlardan biri — Innovatsion rivojlanish strategiyasini ishlab chiqish e’tibor markazida bo‘ldi. Strategiyaning asosiy maqsadi innovatsion rivojlanish yo‘liga o‘tish orqali jamiyat farovonligini mustahkamlash va barqaror taraqqiyotni ta’minlashdan iborat.

—Prezident Shavkat Mirziyoyev tomonidan O‘zbekistonning innovatsion strategiyasini yaratish bo‘yicha vazifa topshirilgandi, — deydi Innovatsion rivojlanish vaziri o‘rinbosari Sherzod Shermatov. — Buni oddiy yo‘l orqali, bir xonaga hamma ekspertlar yig‘ilgan holda ertalabgacha tezkorlik bilan tayyorlab berishimiz mumkin edi. Lekin biz bu yo‘lni tanlamadik. Muddat 1- aprel edi, uni surishni so‘radik va bu muddat 1-iyulga surildi. Maqsad bitta — bu hujjat mukammal bo‘lishi hamda u qog‘ozda qolib ketmasligi va amalda haqiqatdan ham ishlashi kerak.

— Dunyo innovatsion indeksidagi hozirgi holatimizni qoniqarli deb bo‘lmaydi, — deb so‘zida davom etadi Sherzod Shermatov. — 2015-yildagi ko‘rsatkich bo‘yicha O‘zbekiston reytingda 122-o‘rinni egallagan. Undan keyingi hisobotlarda mamlakat hatto tushib ham qolgan. Sababi, O‘zbekiston haqida to‘liq ma’lumot bo‘lmagan. Reytingning top-50 davlatlari ro‘yxatiga kirishni maqsad qilganmiz, deyishimiz mumkin edi, lekin uning barcha ko‘rsatkichlari bo‘yicha ko‘tarilib bo‘lmaydi. Albatta, harakat qilishimiz kerak, ammo resurslarimiz chegaralangan. Strategiyani ishlab chiqish jarayonida barcha tarmoqlarni qamrab olishga harakat qildik.

Davra suhbati davomida O‘zbekiston uchun rivojlanish drayverlari belgilandi, strategiyani amalga oshirishda yuzaga kelishi mumkin bo‘lgan xatarlar aniqlandi va muqobil ssenariylar ishlab chiqildi. Shuningdek, Innovatsion rivojlanish vazirligi va BMT Taraqqiyot dasturi hamkorligida “Harakatlar rejasi”ni tuzish ishlari boshlandi.