O‘zAga Samarqand viloyati Narpay tumani Nog‘oraxona mahallasida yashovchi fuqaro Shoira Suyarovadan shikoyat ariza kelib tushdi.
Unda yozilishicha, Shoira Suyarova hamda uning turmush o‘rtog‘i Jamshid Suyarov o‘zlari yashab turgan mahalla hududida sun’iy qoplamali mini-futbol maydoni va sport majmuasi qurish uchun tuman hokimligiga murojaat qilgan. Murojaat qanoatlantirilib, 2014-yil 8-mayda Narpay tumani hokimining qarori bilan Oqtosh shahri “Nog‘oraxona” mahalla fuqarolar yig‘ini hududidan tuman hokimligi zaxira yerlari hisobidan 0,2125 gektar yer maydoni ajratib beriladi. Tadbirkor bu yerda o‘z mablag‘i hisobidan sun’iy qoplamali mini-futbol maydoni qurib, 2016-yilda ishga tushiradi. Stadion yonida qolgan maydonda tadbirkor yopiq sport majmuasi qurishni rejalashtiradi va shu maqsadda qo‘shimcha yer maydoni ajratilishini so‘rab, tuman hokimligiga murojaat qiladi.
Ammo so‘ralayotgan yer 2018-yil 31-mart kuni tuman hokimining qarori bilan savdo va maishiy xizmat ko‘rsatish binolari qurish uchun “Qoraqir chorvasi” fermer xo‘jaligiga ajratib beriladi.
“Biz ikki yildan buyon ushbu yer maydonini bizga yopiq sport majmuasi qurish uchun ajratib berishini so‘rab hokimlikka bir necha bor murojaat qildik. Hatto, joriy yil 8-yanvar kuni tuman hokimiga yozgan arizamda o‘zimizning mini-futbol maydonimiz yonidan sport zali bilan birga, maishiy xizmat ko‘rsatish binosi qurishga ham rozi bo‘lib, 4 sotix yer so‘radim. Ammo arizamga Narpay tuman arxitektura va qurilish bo‘limi boshlig‘i, bosh arxitektor I.Mardonov imzosi bilan kelgan xatda ‘O‘zbekiston Respublikasi Vazirlar Mahkamasining 2015-yil 7-oktabrdagi 285-sonli qarori bilan 2016-yil 1-yanvardan boshlab yuridik va jismoniy shaxslarga tadbirkorlik faoliyatini amalga oshirish uchun aholi punktlarida doimiy foydalanishga yer maydoni 1 gektargacha va 1 gektar bo‘lgan yer uchastkalari faqat tanlov asosida beriladi. Ushbu qarorning 1-ilovasi bilan tasdiqlangan Nizomning 35-bandiga asosan tanlovda qatnashish uchun ‘Ko‘chmas mulk savdo xizmati’ MChJning hududiy filialiga yer uchastkasi olish uchun murojaat qilishingizni ma’lum qilamiz’, deb javob berildi. Lekin biz so‘rayotgan yer uchun hech qanday tanlov o‘tkazilmadi-ku?! Tanlovsiz beriladigan yer ekan-ku! Nega bizga noto‘g‘ri ma’lumot berishdi”, – deydi Shoira Suyarova.
Narpay tumani hokimligi qurilish bo‘yicha bosh mutaxassisi N.Po‘latov esa Shoira Suyarovaning bu savoliga javoban “arizachiga bu haqda tushuntirganmiz”, deyish bilan cheklandi.
“16-may kuni bir guruh faollar bilan Nog‘oraxona mahallasiga borib, Jamshid Suyarov va Shoira Suyarova hamda ‘Qoraqir chorvasi’ fermer xo‘jaligi rahbari Q.Boymurodov bilan uchrashdik. Ushbu yer maydoni uchun qaror qabul qilingani, endi tortishish, arizabozlikdan foyda yo‘qligini tushuntirdik. Hududda maishiy xizmat kompleksi qurilsa, mahalla ahliga xizmat qilishi, bir necha kishi ish bilan ta’minlanishini aytdik”, – deydi Narpay tumani hokimining birinchi o‘rinbosari Sh.Rahmonov.
“Nog‘oraxona” mahalla fuqarolar yig‘ini raisi A.Abdullayevning aytishicha, mahalla ahli hududda yopiq sport zali bo‘lishini istaydi. Biroq aholining ko‘pchiligi maishiy xizmat majmuasi qurilishi tarafdori ekan. Chunki, fermer xo‘jaligi maishiy xizmat majmuasining ikkinchi qavatida tikuvchilik sexi ochib, 20 kishini ish bilan ta’minlashni rejalashtirgan. Ayniqsa, bu yerda o‘tgan yil qurilgan har biri 16 xonadondan iborat ikkita ko‘p qavatli uyda yashovchilarning ko‘pchiligi ishsiz, ehtiyojmand oilalar hisoblanadi.
Shoira Suyarova esa mahallada sport majmuasi qurishni so‘rab yozilgan arizaga hududda yashovchi 50 ga yaqin kishi imzo qo‘yganini aytib, yer uchun qaror qabul qilishda mahalla ahlining fikri inobatga olinmaganini bayon etdi.
“Aslida, mahallaning o‘zida, tuman doirasida hal bo‘ladigan masalaning bu qadar chigallashib ketishi, turli idoralarga murojaatlar ko‘payishi bizning nazarimizda ikki tomonning ham bir-birini tushunmagani, muammo hokimlik, tadbirkorlar va mahalla ahli ishtirokida ochiq-oydin muhokama etib hal etilmagani bilan bog‘liq.
Negaki, Jamshid Suyarov va Shoira Suyarova sun’iy qoplamali futbol-maydoni yonida o‘z tasarrufidagi yer maydonida kichikroq bo‘lsa-da, yopiq sport majmuasi – sport zali qurishi mumkin. Tadbirkor hozir ham bu ishni bajarishga tayyor. Lekin ularning aytishicha, shu paytgacha bu haqda na hokimlik va na boshqa mutasaddi idora tushuntirgan.
Hokimlik vakillari, faollar tuman hokimligi zaxirasidagi yer maydoni uchun qaror chiqishidan oldin tadbirkorlarni murosaga chaqirishi, mahalla ahli bilan uchrashib, ularning fikrini eshitishi mumkin edi-ku!? Balki shunda Nog‘oraxonadan bunaqa gap-so‘zlar chiqmasmidi”, — deyiladi xabarda.
Izoh (0)