Самарқанд вилоятида диний экстремизм ғоялари таъсирига тушиб қолган 241 нафар шахс қидирувга берилганди. Бу ҳақда «Зарафшон» газетаси маълум қилди.
Сўнгги 5 ой ичида оила аъзолари билан ўтказилган тарғибот ва тезкор қидирув тадбирлари натижасида уларнинг 15 нафари яшаш манзилларига қайтарилди. 13 киши авф этилди.
Бу ҳақда Самарқанд шаҳрида ўтказилган «Биз диний экстремизм ва терроризмга қаршимиз» мавзусидаги давра суҳбатида айтиб ўтилди.
Қайд этилишича, вилоятда диний экстремизм ғоялари таъсирига тушиб қолиб, махсус ҳисобда турган 1 623 фуқаро рўйхатдан чиқарилди. Жорий йилнинг ўтган даврида диний экстремизм ва терроризм билан боғлиқ 11 та жиноят аниқланиб, 12 кишига нисбатан жиноий иш қўзғатилди.
Уларнинг 8 нафари пул топиш мақсадида хорижга бориб, интернет орқали экстремистик гуруҳга қўшилган, 4 нафари эса диний ақидапарастликни тарғиб қилган. Тадбирда уларнинг бундай ишларга қўл уришига оила ва маҳалласидаги муҳит, ишсизлик ва бошқа омиллар сабаб бўлгани таъкидланди.
Изоҳ (0)