Toshkent irrigatsiya va qishloq xo‘jaligini mexanizatsiyalash muhandislari instituti (TIQXMMI) negizida Qozoq-nemis universiteti (QNU) talabalari uchun “Suv resurslaridan foydalanish asoslari: nazariya, amaliyot va ilmiy tadqiqotlar integratsiyasi” mavzusiga bag‘ishlangan yozgi o‘quv kursi o‘tkazilmoqda. Bu haqda “Daryo” manbasi xabar bermoqda.
Kurs AQSh xalqaro taraqqiyot agentligi (USAID), Markaziy Osiyo mintaqaviy ekologiya markazi (MOMEM), O‘zbekiston Respublikasi Suv xo‘jaligi vazirligining (SXV) hamkorlikdagi “Suv, ta’lim va hamkorlik” (Smart Waters) loyihasi doirasida tashkil etilgan.
Yozgi maktabda Afg‘onistan, Qozog‘iston, Qirg‘iziston Tojikiston kabi mamlakatlar vakillari bo‘lgan QNU talablari tahsil olmoqda.
O‘quv kursining asosiy maqsadi – kelgusida Markaziy Osiyo hududida qo‘llaniladigan bilim va ko‘nikmalarni QNU talabalariga yetkazish va ularning bu boradagi bilimlarini mustahkamlash, QNU va TIQXMMI talabalari o‘rtasida muloqot maydonini yaratish hamda mahalliy institutimizning ilmiy-texnik salohiyatidan foydalanishdan iborat.
14 nafar talaba 102 o‘quv soati mobaynida nazariy, amaliy, laboratoriyaviy va mustaqil mashg‘ulotlarda ishtirok etadi. Shuningdek, irrigatsiya va melioratsiya obyektlari, suvni tejovchi texnologiyalar o‘rnatilgan joylarda sayyor mashg‘ulotlar o‘tashlari ko‘zda tutilgan.
Umuman olganda, ikki haftalik o‘quv kursi mobaynida talabalar suv resurslarini havzalar darajasida boshqarish asoslari, irrigatsion tizimlarda oqimlarning oqish qonuniyati, gidrotexnik inshootlarning ekspluatatsion ishonchliligi va xavfsizligi, nasos stansiyalari va nasoslar ekspluatatsiyasi, suv tejovchi sug‘orish texnologiyalari singari modullar bilan tanishishadi. Ma’ruza qismidan tashqari ishtirokchilar uchun sport-madaniy tadbirlar ham tayyorlangan.
Bundan tashqari, QNU talabalari 5—8-iyun kunlari Toshkent shahrida bo‘lib o‘tadigan Markaziy Osiyo xalqaro ekologiya forumida (MOXEF-2018) faol ishtirok etadi.
Izoh (0)