O‘zbekiston futbol assotsiatsiyasi Italiyaning “Inter” klubi futbol akademiyasi bilan muzokaralar olib bormoqda. Bu haqda tashkilot rasmiy saytida xabar berildi.
Ta’kidlanishicha, muzokaralardan ko‘zlangan maqsad — Toshkentda “Inter” futbol klubi akademiyasi rasmiy fililani ochishga erishish.
“Inter” akademiyasi dunyoga mashhur futbol akademiyalardan biri bo‘lib, o‘tgan yili akademiya tarbiyalanuvchilari Italiyada 15,16,17 va 18 yoshlilar o‘rtasidagi chempionatlarda g‘oliblikni qo‘lga kiritgan.
Ayni paytda butun dunyoda Italiyadan tashqari faqat Xitoyda “Inter” klubi akademiyasi rasmiy filiali mavjud. Buning sababi – klub aksiyalarining katta qismi Xitoyning Suning Commerce Group kompaniyasi hisoblanadi.
Agar muzokaralar muvaffaqiyatli yakuniga yetsa, O‘zbekiston “Inter” klubi akademiyasining rasmiy filiali ochilgan dunyodagi ikkinchi mamlakatga aylanadi.
Xabarda ta’kidlanishicha, O‘FAning maqsadi faqat o‘zbekistonlik futbolchilar uchun akademiya tashkil etish emas. Maqsad Toshkentda “Inter” klubining futbolchilar tayyorlash bo‘yicha O‘rta Osiyo mamlakatlaridagi Markazini tashkil etishdan iborat.
Izoh (0)