Kim Chen In baribir Tramp bilan ko‘rishadigan bo‘ldi. Agar uning mehmonxona xarajatlarini kimdir ko‘taradigan bo‘lsa

AQSh prezidenti Donald Tramp 1-iyun kuni KXDR yetakchisi Kim Chen In bilan 12-iyunga rejalashtirilgan uchrashuvi baribir o‘tkazilishini e’lon qildi (vaholanki, atigi bir hafta bu uchrashuvni o‘zi bekor qilgandi). Biroq, The Washington Post’ning o‘z manbalariga asoslanib xabar berishicha, uchrashuv tashkilotchilari kutilmagan bir to‘siqqa duch kelgan: ular KXDR yetakchisi uchun mehmonxona haqini kim to‘lashi lozimligi borasida kelisha olmayapti.

https://instagram.com/p/BjRNTLhF0w9/?utm_source=ig_embed

Gazeta ma’lumotlariga ko‘ra, Shimoliy Koreya Fullerton mehmonxonasidagi bir kechasi 6 ming dollarlik xona haqini biror boshqa davlat to‘lashini istayapti. AQSh to‘lovni amalga oshirishga tayyor, ammo shimolliklar buni haqorat sifatida qabul qilishi mumkinligidan xavotirda. Boz ustiga, KXDR yetakchisi uchun mehmonxona haqini to‘lash sanksiya rejimini buzadi, shu bois hali AQSh Moliya vazirligidan ruxsat ham olish zarur.

https://instagram.com/p/BfdObbIhIvn/?utm_source=ig_embed

Boshqa variant ham bor: Kim Chen Inning xarajatlarini Singapur ko‘tarishi mumkin. Ushbu mamlakat mudofaa vaziri Ng Eng Xenning ma’lum qilishicha, Singapur AQSh—KXDR sammitini uyushtirish bo‘yicha xarajatlarning bir qismini ko‘tarishga tayyor.

Kim Chen In Singapurga qanday qilib yetib olishi ham noma’lum qolmoqda. Gazeta ma’lumotlariga ko‘ra, KXDR foydalanadigan eski samolyotlar 4500 kilometrlik masofani bosib o‘ta olmaydi; shunday ekan, Kim Chen In yo Xitoyda to‘xtab o‘tishga majbur bo‘ladi, yoki boshqa birovning samolyotidan foydalanishiga to‘g‘ri keladi.

The Washington Post’ning yozishicha, Shimoliy Koreyannig xalqaro muzokaralar vaqtida o‘zining qashshoqligini pesh qilib, xarajatlarini boshqa davlatlar ko‘tarishini muntazam talab qilib keladi. Xususan, KXDR delegatsiyasining Pxyonchxan Olimpiadasiga safari xarajatlarini ham Janubiy Koreya ko‘targan.

Agar Donald Tramp va Kim Chen Inning uchrashuvi haqiqatan ham o‘tkazilsa, bu AQSh va KXDR amaldagi davlat rahbarlarining ilk yuzma-yuz muzokaralari bo‘ladi. Uchrashuv o‘tkazilishi haqida 2018 yil bahorida kelishib olingan edi.