АҚШ президенти Дональд Трамп 1 июнь куни КХДР етакчиси Ким Чен Ин билан 12 июнга режалаштирилган учрашуви барибир ўтказилишини эълон қилди (ваҳоланки, атиги бир ҳафта бу учрашувни ўзи бекор қилганди). Бироқ, The Washington Post’нинг ўз манбаларига асосланиб хабар беришича, учрашув ташкилотчилари кутилмаган бир тўсиққа дуч келган: улар КХДР етакчиси учун меҳмонхона ҳақини ким тўлаши лозимлиги борасида келиша олмаяпти.
https://instagram.com/p/BjRNTLhF0w9/?utm_source=ig_embed
Газета маълумотларига кўра, Шимолий Корея Fullerton меҳмонхонасидаги бир кечаси 6 минг долларлик хона ҳақини бирор бошқа давлат тўлашини истаяпти. АҚШ тўловни амалга оширишга тайёр, аммо шимолликлар буни ҳақорат сифатида қабул қилиши мумкинлигидан хавотирда. Боз устига, КХДР етакчиси учун меҳмонхона ҳақини тўлаш санкция режимини бузади, шу боис ҳали АҚШ Молия вазирлигидан рухсат ҳам олиш зарур.
https://instagram.com/p/BfdObbIhIvn/?utm_source=ig_embed
Бошқа вариант ҳам бор: Ким Чен Иннинг харажатларини Сингапур кўтариши мумкин. Ушбу мамлакат мудофаа вазири Нг Энг Хеннинг маълум қилишича, Сингапур АҚШ—КХДР саммитини уюштириш бўйича харажатларнинг бир қисмини кўтаришга тайёр.
Ким Чен Ин Сингапурга қандай қилиб етиб олиши ҳам номаълум қолмоқда. Газета маълумотларига кўра, КХДР фойдаланадиган эски самолётлар 4500 километрлик масофани босиб ўта олмайди; шундай экан, Ким Чен Ин ё Хитойда тўхтаб ўтишга мажбур бўлади, ёки бошқа бировнинг самолётидан фойдаланишига тўғри келади.
The Washington Post’нинг ёзишича, Шимолий Кореянниг халқаро музокаралар вақтида ўзининг қашшоқлигини пеш қилиб, харажатларини бошқа давлатлар кўтаришини мунтазам талаб қилиб келади. Хусусан, КХДР делегациясининг Пхёнчхан Олимпиадасига сафари харажатларини ҳам Жанубий Корея кўтарган.
Агар Дональд Трамп ва Ким Чен Иннинг учрашуви ҳақиқатан ҳам ўтказилса, бу АҚШ ва КХДР амалдаги давлат раҳбарларининг илк юзма-юз музокаралари бўлади. Учрашув ўтказилиши ҳақида 2018 йил баҳорида келишиб олинган эди.
Изоҳ (0)