GM Uzbekistan eksport qilinadigan mashinalar narxini oshiradi

GM Uzbekistan avtomashinalari narxlarini eksport bozorlarida oshirishni rejalashtirmoqda. Bu haqda Sputnik xabar berdi.

“O‘zavtosanoat” rahbari Umidjon Salimovga ko‘ra, hozirgi vaqtda kompaniya xorijiy bozorlar narxlarini o‘rganmoqda va bu ish bir oyga yaqin vaqtni olishi mumkin.

“Eksport narxlari oshishi aniq. Barcha bozorlar uchun yagona narxlarimiz bor, shuning uchun Rossiya, Qozog‘iston va boshqa joylarda narxlar oshadi. Hozir bir qancha ssenariylar ko‘rib chiqilmoqda. Ya’ni narxlar 10, 15, 20 va 25 foizga ko‘payishi mumkin”, — ta’kidladi “O‘zavtosanoat” rahbari.

Salimovning so‘zlariga qaraganda, hozirgi vaqtda mashinalar narxini oshirilishi kompaniyaning xorijiy bozorda raqobatbardoshligiga qanday ta’sir qilishi mumkinligi batafsil o‘rganib chiqilmoqda.