Farg‘ona viloyatining Oltiariq tumanida “Obod qishloq” dasturi asosida Poloson, Qapchug‘ay hamda Tinchlik qishloqlari obod bo‘ldi. Mazkur qishloqlar hududidagi 10 ta mahalla fuqarolar yig‘inida qurilish ta’mirlash, obodonlashtirish ishlari amalga oshirildi. Bu haqda “Daryo” muxbiri Azizjon Ermatov xabar bermoqda.
Qapchug‘ayda 38 ta’mirga muhtoj xonadon hamda 19 ko‘p qavatli uyda 530 million so‘mlik bunyodkorlik ishlari amalga oshirildi. Yangidan ichimlik suvi tarmoqlari tortilib, suv minorasi ta’mirlandi va yangi suv nasosi o‘rnatildi. Piyodalar yo‘laklari barpo etilib, uylarning kirish yo‘laklariga asfalt yotqizildi. 7 zamonaviy avtobus bekatlari qurilib, yo‘l chetiga maxsus to‘siqlar o‘rnatildi. 9 ta bolalar o‘yingohi hamda 7 ta bolalar maydonchasi qurildi.
44-bog‘chaning tashlandiq binosi o‘rnida “Aqlli bolajon” nomli davlat sherikchiligidagi nodavlat maktabgacha ta’lim muassasasi bunyod etildi. 140 o‘rinli bog‘cha chet tillariga ixtisoslashgan. Unda sport maydonchalari, yo‘l harakati qoidalarini innovatsion usulda o‘rgatishga mo‘ljallangan avtodrom, maxsus jihozlangan musiqa va til o‘rgatish xonalari mavjud.
Qishloqda tadbirkor Sabriniso Vahobova tomonidan “Iymona atlas” xususiy korxonasi faoliyati yo‘lga qo‘yildi. Tikuvchilikni rivojlantirish, tayyor matodan sifatli mahsulot tayyorlashga ixtisoslashgan korxonada 200 nafar ayollar ish bilan ta’minlanadi.
Shu hududdagi qishloqlarga xizmat ko‘rsatuvchi 100 o‘rinli 89-sonli qishloq oilaviy poliklinikasi ham qayta rekonstruksiya qilinib, yangi tibbiy uskunalar bilan jihozlandi. Shifoxona ichida ijtimoiy dorixona ish boshladi.
Tinchlik shaharchasidagi madaniyat va istirohat bog‘i va uning atrofidagi ko‘p qavatli uylar uzoq yillardan buyon qarovsiz qolgan edi. Mazkur hududda olib borilgan mukammal ta’mirlash ishlari natijasida bog‘ sathida bolalar o‘yin maydonchalari, turli ko‘ngilochar attraksionlar ish boshladi. Hududda non sexi, dehqon bozori qurildi, 300 o‘rinli madaniyat uyi ta’mirdan chiqarildi.
Polosonda 42, Tinchlik mahallasida 14 aholi xonadoni hamda 21 ko‘p qavatli uyni ta’mirlash ishlariga 650 million so‘mdan ortiq mablag‘ sarflandi. Tuman elektr tarmoqlari korxonasi tomonidan 117,4 million so‘m evaziga yog‘och tayanchlar beton tayanchlarga almashtirildi. Yuqori va o‘rta bosimli gaz quvurlari, undagi qurilmalar va jihozlar ta’mirlandi.
Izoh (0)