Фарғона вилоятининг Олтиариқ туманида «Обод қишлоқ» дастури асосида Полосон, Қапчуғай ҳамда Тинчлик қишлоқлари обод бўлди. Мазкур қишлоқлар ҳудудидаги 10 та маҳалла фуқаролар йиғинида қурилиш таъмирлаш, ободонлаштириш ишлари амалга оширилди. Бу ҳақда «Дарё» мухбири Азизжон Эрматов хабар бермоқда.
Қапчуғайда 38 таъмирга муҳтож хонадон ҳамда 19 кўп қаватли уйда 530 миллион сўмлик бунёдкорлик ишлари амалга оширилди. Янгидан ичимлик суви тармоқлари тортилиб, сув минораси таъмирланди ва янги сув насоси ўрнатилди. Пиёдалар йўлаклари барпо этилиб, уйларнинг кириш йўлакларига асфальт ётқизилди. 7 замонавий автобус бекатлари қурилиб, йўл четига махсус тўсиқлар ўрнатилди. 9 та болалар ўйингоҳи ҳамда 7 та болалар майдончаси қурилди.
44-боғчанинг ташландиқ биноси ўрнида «Ақлли болажон» номли давлат шерикчилигидаги нодавлат мактабгача таълим муассасаси бунёд этилди. 140 ўринли боғча чет тилларига ихтисослашган. Унда спорт майдончалари, йўл ҳаракати қоидаларини инновацион усулда ўргатишга мўлжалланган автодром, махсус жиҳозланган мусиқа ва тил ўргатиш хоналари мавжуд.
Қишлоқда тадбиркор Сабринисо Ваҳобова томонидан «Иймона атлас» хусусий корхонаси фаолияти йўлга қўйилди. Тикувчиликни ривожлантириш, тайёр матодан сифатли маҳсулот тайёрлашга ихтисослашган корхонада 200 нафар аёллар иш билан таъминланади.
Шу ҳудуддаги қишлоқларга хизмат кўрсатувчи 100 ўринли 89-сонли қишлоқ оилавий поликлиникаси ҳам қайта реконструкция қилиниб, янги тиббий ускуналар билан жиҳозланди. Шифохона ичида ижтимоий дорихона иш бошлади.
Тинчлик шаҳарчасидаги маданият ва истироҳат боғи ва унинг атрофидаги кўп қаватли уйлар узоқ йиллардан буён қаровсиз қолган эди. Мазкур ҳудудда олиб борилган мукаммал таъмирлаш ишлари натижасида боғ сатҳида болалар ўйин майдончалари, турли кўнгилочар аттракционлар иш бошлади. Ҳудудда нон цехи, деҳқон бозори қурилди, 300 ўринли маданият уйи таъмирдан чиқарилди.
Полосонда 42, Тинчлик маҳалласида 14 аҳоли хонадони ҳамда 21 кўп қаватли уйни таъмирлаш ишларига 650 миллион сўмдан ортиқ маблағ сарфланди. Туман электр тармоқлари корхонаси томонидан 117,4 миллион сўм эвазига ёғоч таянчлар бетон таянчларга алмаштирилди. Юқори ва ўрта босимли газ қувурлари, ундаги қурилмалар ва жиҳозлар таъмирланди.
Изоҳ (0)