Turkiya prezidenti Rajab Toyyib Erdo‘g‘on mamlakat fuqarolarini dollar va yevrolardagi pul omonatlarini liralarga o‘tkazishga chaqirdi. Erdo‘g‘onning fikricha, bu turk milliy valyutasi qadri o‘sishiga yordam beradi, deya xabar bermoqda “RBK”.
Erzurumdagi saylovoldi chiqishida Erdo‘g‘on yostiq ostida dollar va yevro saqlab o‘tirganlarni o‘z jamg‘armalarini turk liralariga almashtirishga chaqirdi. “Bu rejalarga birgalikda xalal beraylik”, — dedi Turkiya prezidenti.
Erdo‘g‘onning qayd etishicha, turklar — biznesmen Jorj Sorosning emas, balki Allohning qullaridir, shu bois, agar moliya sektori turk investorlari bilan “shunday o‘yinlar qilishda davom etsa”, ular buning uchun yaxshigina haq to‘lashga majbur bo‘ladi.
Avvalroq Financial Times nashri turk iqtisodchilari Erdo‘g‘onning “turk lirasi — dollarga qarshi yagona haqiqiy muxolif” degan fikrini shubha ostiga olgani haqida xabar bergan edi. Yil boshidan beri Turkiya valyutasi dollarga nisbatan 20 foizga qadrsizlandi. Societe Generale tahlilchisi Feniks Kalenning so‘zlariga ko‘ra, vaziyatni Turkiyada siyosiy yo‘nalishning o‘zgarishigina yumshatishi mumkin.
Lira kursi 2016-yil yozidan boshlab, mamlakatda harbiylar tomonidan davlat to‘ntarishiga urinish amalga oshirilganidan beri pastlamoqda. 2017-yil boshida Bloomberg agentligi lirani eng yomon valyuta tan olgan edi. Erdo‘g‘on bunda “qo‘li dollarga to‘la terrorchilar”ni ayblagan edi.
Turkiyada 24-iyun kuni muddatidan avvalgi prezident saylovi bo‘lib o‘tadi. Shundan so‘ng prezidentning vakolatlari yanada kengayishini nazarda tutuvchi konstitutsiyaviy o‘zgarishlar kuchga kiradi.
Izoh (0)