Janubiy Koreya prezidenti Mun Chje In 26-may, shanba kuni Pxanmunjom chegara punktida KXDR yetakchisi Kim Chen In bilan uchrashdi. Bu haqda Janubiy Koreya prezidenti matbuot xizmati xabar berdi.
Rasmiy bayonotda qayd etilishicha, ikki mamlakat yetakchilari 27-aprel kuni imzolangan Pxanmunjom deklaratsiyasining bajarilishi hamda KXDR—AQSh sammitini o‘tkazish masalalarini muhokama qilgan.
Uchrashuv mahalliy vaqt bilan 15:00 dan 17:00 gacha (Toshkent vaqti bilan 11:00 dan 13:00 gacha) davom etgan. Xabar berishlaricha, muzokaralar natijalari haqida ertaga, 27-may kuni rasmiy bayonot beriladi.
Bu Shimol va Janub yetakchilarining so‘nggi bir oy ichidagi ikkinchi uchrashuvidir. Birinchisi ham Pxanmunjom chegara punktida bo‘lib o‘tgan, u 27-aprel kuni o‘tkazilgan edi. O‘shanda tomonlar muzokaralar yakuni bo‘yicha tinchlik kelishuvini ishlab chiqib, uni imzolagan edi.
12-iyun kuni Kim Chen In AQSh prezidenti Donald Tramp bilan uchrashishi kutilayotgan edi, biroq joriy hafta Tramp uchrashuvni bekor qilishini e’lon qildi. Ayni vaqtda, AQSh yetakchisi kelajakda uchrashuv bo‘lib o‘tishi mumkinligini inkor etmagan edi.
Izoh (0)