Туркия президенти Ражаб Тоййиб Эрдўғон мамлакат фуқароларини доллар ва евролардаги пул омонатларини лираларга ўтказишга чақирди. Эрдўғоннинг фикрича, бу турк миллий валютаси қадри ўсишига ёрдам беради, дея хабар бермоқда «РБК».
Эрзурумдаги сайловолди чиқишида Эрдўғон ёстиқ остида доллар ва евро сақлаб ўтирганларни ўз жамғармаларини турк лираларига алмаштиришга чақирди. «Бу режаларга биргаликда халал берайлик», — деди Туркия президенти.
Эрдўғоннинг қайд этишича, турклар — бизнесмен Жорж Сороснинг эмас, балки Аллоҳнинг қулларидир, шу боис, агар молия сектори турк инвесторлари билан «шундай ўйинлар қилишда давом этса», улар бунинг учун яхшигина ҳақ тўлашга мажбур бўлади.
Аввалроқ Financial Times нашри турк иқтисодчилари Эрдўғоннинг «турк лираси — долларга қарши ягона ҳақиқий мухолиф» деган фикрини шубҳа остига олгани ҳақида хабар берган эди. Йил бошидан бери Туркия валютаси долларга нисбатан 20 фоизга қадрсизланди. Societe Generale таҳлилчиси Феникс Каленнинг сўзларига кўра, вазиятни Туркияда сиёсий йўналишнинг ўзгаришигина юмшатиши мумкин.
Лира курси 2016 йил ёзидан бошлаб, мамлакатда ҳарбийлар томонидан давлат тўнтаришига уриниш амалга оширилганидан бери пастламоқда. 2017 йил бошида Bloomberg агентлиги лирани энг ёмон валюта тан олган эди. Эрдўғон бунда «қўли долларга тўла террорчилар»ни айблаган эди.
Туркияда 24 июнь куни муддатидан аввалги президент сайлови бўлиб ўтади. Шундан сўнг президентнинг ваколатлари янада кенгайишини назарда тутувчи конституциявий ўзгаришлар кучга киради.
Изоҳ (0)