Toshkentda ilk bor Yosh liderlar xalqaro konferensiyasi bo‘lib o‘tadi

Joriy yil 27—31-may kunlari Toshkentda ilk bor Yosh liderlar xalqaro konferensiyasi bo‘lib o‘tadi. Bu haqda “Jahon” agentligi xabar berdi.

XVII Yosh liderlar konferensiyasida Avstriya, Argentina, Buyuk Britaniya, Vengriya, Germaniya, Gretsiya, Xitoy, Niderlandiya, Rossiya, Serbiya, AQSh, O‘zbekiston, Fransiya va Estoniyadan qariyb 40 nafar vakil ishtirok etishi kutilmoqda. Forum Germaniyaning Global Bridges  ijtimoiy tashkiloti va O‘zbekiston Yoshlar ittifoqi tomonidan O‘zbekistonning Berlindagi elchixonasi hamda Germaniyaning Toshkentdagi elchixonasi ko‘magida o‘tkaziladi.

Tadbir dasturiga ko‘ra, ishtirokchilar xalqaro va mintaqaviy siyosat, savdo-iqtisodiy aloqalarni kengaytirish istiqbollari, shuningdek, O‘zbekistonning bugungi taraqqiyoti, uning yetakchi davlatlar bilan o‘zaro munosabatlari va mintaqaviy hamkorlikni mustahkamlashdagi roliga oid dolzarb mavzularda fikr almashadi.

Shuningdek, tadbir ishtirokchilarining O‘zbekiston Yoshlar ittifoqi Markaziy kengashi, Strategik va mintaqalararo tadqiqotlar instituti, Qonunchilik muammolari va parlament tadqiqotlari instituti hamda Tarix instituti rahbariyati bilan uchrashuvlar o‘tkazishi ham ko‘zda tutilgan.

Global Bridges 1973-yili Berlinda tashkil etilgan mustaqil notijorat tashkilotdir. Uning faoliyati tijorat tuzilmalari homiylik badallari hisobiga moliyalashtiriladi. Germaniya, AQSh, Xitoy va boshqa davlatlarning yetakchi ta’lim va tadqiqot markazlari mazkur tashkilotning hamkorlari sanaladi. 400 dan ziyod turli sohalardagi tashkilot Global Bridges a’zosi sanaladi.

Tashkilot faoliyatining asosiy yo‘nalishlari siyosat, iqtisodiyot, ilm-fan, ta’lim, madaniyat va ommaviy axborot vositalari sohalaridan 25 dan 35 yoshgacha bo‘lgan salohiyatli yosh liderlar o‘rtasida aloqalarni shakllantirish va rivojlantirishga qaratilgan turli konferensiya va forumlar, simpozium, uchrashuv hamda tanishuv safarlarini tashkil etishdan iborat.

Ushbu maqsadlarda tashkilot 1973-yildan buyon Yosh liderlar dasturini amalga oshirib keladi. Bugungi kunda 40 dan ortiq mamlakatdan salkam 2,5 ming nafar yosh ushbu dasturning ishtirokchisi bo‘ldi.

Mazkur tuzilmaning asosiy tadbirlaridan biri — Yosh liderlar konferensiyasidir. Uning maqsadi — malakali va ulkan salohiyatli yoshlarga mintaqaviy va xalqaro miqyosdagi dolzarb mavzularda fikr almashishga zamin yaratish, shuningdek, turli mamlakatlardan kelgan ishtirokchilar o‘rtasidagi aloqalarni mustahkamlashdan iborat.

Global Bridges vakillari joriy yil fevral oyida O‘zbekistonga tanishuv safari uyushtirdi. Uning doirasida Tashqi ishlar vazirligi, Investitsiyalar bo‘yicha davlat qo‘mitasi, Oliy Majlis huzuridagi Qonunchilik muammolari va parlament tadqiqotlari instituti va Yoshlar ittifoqida turli uchrashuvlar bo‘lib o‘tdi. Mazkur tashrif yakuni bo‘yicha navbatdagi konferensiyani Toshkentda o‘tkazish qarori qabul qilindi.