Жорий йил 27—31 май кунлари Тошкентда илк бор Ёш лидерлар халқаро конференцияси бўлиб ўтади. Бу ҳақда «Жаҳон» агентлиги хабар берди.
ХVII Ёш лидерлар конференциясида Австрия, Аргентина, Буюк Британия, Венгрия, Германия, Греция, Хитой, Нидерландия, Россия, Сербия, АҚШ, Ўзбекистон, Франция ва Эстониядан қарийб 40 нафар вакил иштирок этиши кутилмоқда. Форум Германиянинг Global Bridges ижтимоий ташкилоти ва Ўзбекистон Ёшлар иттифоқи томонидан Ўзбекистоннинг Берлиндаги элчихонаси ҳамда Германиянинг Тошкентдаги элчихонаси кўмагида ўтказилади.
Тадбир дастурига кўра, иштирокчилар халқаро ва минтақавий сиёсат, савдо-иқтисодий алоқаларни кенгайтириш истиқболлари, шунингдек, Ўзбекистоннинг бугунги тараққиёти, унинг етакчи давлатлар билан ўзаро муносабатлари ва минтақавий ҳамкорликни мустаҳкамлашдаги ролига оид долзарб мавзуларда фикр алмашади.
Шунингдек, тадбир иштирокчиларининг Ўзбекистон Ёшлар иттифоқи Марказий кенгаши, Стратегик ва минтақалараро тадқиқотлар институти, Қонунчилик муаммолари ва парламент тадқиқотлари институти ҳамда Тарих институти раҳбарияти билан учрашувлар ўтказиши ҳам кўзда тутилган.
Global Bridges 1973 йили Берлинда ташкил этилган мустақил нотижорат ташкилотдир. Унинг фаолияти тижорат тузилмалари ҳомийлик бадаллари ҳисобига молиялаштирилади. Германия, АҚШ, Хитой ва бошқа давлатларнинг етакчи таълим ва тадқиқот марказлари мазкур ташкилотнинг ҳамкорлари саналади. 400 дан зиёд турли соҳалардаги ташкилот Global Bridges аъзоси саналади.
Ташкилот фаолиятининг асосий йўналишлари сиёсат, иқтисодиёт, илм-фан, таълим, маданият ва оммавий ахборот воситалари соҳаларидан 25 дан 35 ёшгача бўлган салоҳиятли ёш лидерлар ўртасида алоқаларни шакллантириш ва ривожлантиришга қаратилган турли конференция ва форумлар, симпозиум, учрашув ҳамда танишув сафарларини ташкил этишдан иборат.
Ушбу мақсадларда ташкилот 1973 йилдан буён Ёш лидерлар дастурини амалга ошириб келади. Бугунги кунда 40 дан ортиқ мамлакатдан салкам 2,5 минг нафар ёш ушбу дастурнинг иштирокчиси бўлди.
Мазкур тузилманинг асосий тадбирларидан бири — Ёш лидерлар конференциясидир. Унинг мақсади — малакали ва улкан салоҳиятли ёшларга минтақавий ва халқаро миқёсдаги долзарб мавзуларда фикр алмашишга замин яратиш, шунингдек, турли мамлакатлардан келган иштирокчилар ўртасидаги алоқаларни мустаҳкамлашдан иборат.
Global Bridges вакиллари жорий йил февраль ойида Ўзбекистонга танишув сафари уюштирди. Унинг доирасида Ташқи ишлар вазирлиги, Инвестициялар бўйича давлат қўмитаси, Олий Мажлис ҳузуридаги Қонунчилик муаммолари ва парламент тадқиқотлари институти ва Ёшлар иттифоқида турли учрашувлар бўлиб ўтди. Мазкур ташриф якуни бўйича навбатдаги конференцияни Тошкентда ўтказиш қарори қабул қилинди.
Изоҳ (0)