Prezident Shavkat Mirziyoyev shu yil 2—3-may kunlari Namangan viloyatiga tashrifi davomida hududda yirik ishlab chiqarish sanoati yo‘qligi, yaqin kelajakda bu yerda ham avtomobil zavodi qurish loyihasi amalga oshirilishini ta’kidlagandi. Bu haqda O‘zA xabar bermoqda.
Ushbu xushxabar bunchalik tez ro‘yobga chiqishini ko‘pchilik kutmagan edi. Tashrifdan roppa-rosa yigirma kun o‘tib, mamlakat avtomobilsozlik sanoatida yana bir yirik loyihani amalga oshirish yo‘lida dastlabki qadam tashlandi — Janubiy Koreyaning Evergreen Motors Group kompaniyasi prezidenti Kim Chang Kyon loyiha bo‘yicha amaliy muzokaralar o‘tkazish uchun viloyatga keldi.
Tegishli soha vakillari ishtirokida o‘tkazilgan taqdimot marosimida viloyatda Hyundai yuk avtomobillari va avtobuslarni yig‘ish zavodi qurish loyihasi to‘g‘risida ma’lumot berildi.
Loyihaga ko‘ra, korxonada yuk ko‘tarish sig‘imi 1 tonnadan 50 tonnagacha bo‘lgan yuk avtomobillari va o‘lchami 9-12 metrli shahar ichida qatnovchi, shaharlararo hamda sayyohlik rusumidagi avtobuslar va maxsus transport vositalari yig‘ish ishlari bajariladi.
Dastlab kuniga 8-20 va yiliga 1000 ta avtomobil ishlab chiqariladi. Uch yil ichida bu ko‘rsatkich 3 mingtaga yetkaziladi, ya’ni mingta avtobus va 2 mingta yuk mashinasi ishlab chiqariladi. Avvaliga ehtiyot qismlar Janubiy Koreyadan keltirilsa, mahalliylashtirish dasturi asosida uch yil mobaynida ehtiyot qismlarni bosqichma-bosqich shu yerning o‘zida ishlab chiqarish o‘zlashtiriladi.
Loyiha ishga tushirilishi bilan 1000 ga yaqin ish o‘rni yaratiladi, kelajakda bu ko‘lam 6 mingtaga yetkazilishi rejalashtirilmoqda.
Delegatsiya a’zolari avtomobil zavodi qurilishi uchun tavsiya qilinayotgan maydonlar va u yerdagi sharoitlar bilan tanishdi.
Izoh (0)