O‘zbekistonda videoregistratorlarga yo‘l qoidasi buzilishlarining yozilishi rag‘batlantiriladi

O‘zbekistonda jismoniy va yuridik shaxslar avtomobillarini videoregistratorlar bilan jihozlash va ularni Toshkent tajribasini inobatga olgan holda qo‘llashning normativ tartibini o‘rnatish bo‘yicha choralarni amalga oshirish rejalashtirilmoqda. Bu Vazirlar Mahkamasining 19-maydagi 2018–2022-yillar uchun Yo‘l harakati xavfsizligini ta’minlash konsepsiyasini tasdiqlash to‘g‘risidagi qarorida nazarda tutilgan, deb xabar beradi “Gazeta.uz”.

Sentabr oyiga qadar jismoniy va yuridik shaxslar avtomobillariga o‘rnatilgan videoregistratorlardan videoyozuvlarni operativ to‘plashning markazi tizimini joriy etish tartibi bo‘yicha hukumat hujjati loyihasi ishlab chiqiladi.

Elektron tizimga kelib tushadigan videoyozuvlar ichki ishlar organlariga yuborilib, ular orqali yo‘l harakati qoidalari buzilishi holatlari aniqlanadi.

Videomateriallarni markaziy tizimga yuboradigan fuqarolarni rag‘batlantirish mexanizmlari ishlab chiqiladi. Bunda videomateriallar yetkazuvchi fuqarolarning maxfiyligi ta’minlanadi.

Jamoat transporti hamda yo‘lovchi tashuvchi transportda videoregistratorlar o‘rnatilishi majburiy etib belgilanadi.