2018-yil 17—18-may kunlari Samarqand shahrida Xalqaro avtomobil transporti bo‘yicha O‘zbekiston—Turkiya qo‘shma komissiyasining navbatdagi majlisi bo‘lib o‘tdi. Bu haqda O‘zbekiston avtomobil transporti agentligi matbuot xizmatiga tayanib, UzDaily xabar berdi.
Tomonlar 2017-yilning oktabr oyida va 2018-yil aprelida o‘tkazilgan yuqori darajadagi muzokaralar xalqaro avtomobil transporti sohasida ikki tomonlama hamkorlikni yanada rivojlantirish uchun yangi istiqbollarni ochib berganini ta’kidlab o‘tdi.
Shavkat Mirziyoevning 2017-yil oktabr oyida Turkiyaga amalga oshirgan davlat tashrifi O‘zbekiston va Turkiya o‘rtasida yo‘lovchi va yuklarni xalqaro avtomobillarda tashish borasidagi yangi bitimlarning imzolanishiga sabab bo‘lgan.
Uchrashuv chog‘ida ikki mamlakat o‘rtasida xalqaro avtomobil transporti uchun qulay shart-sharoit yaratish, 2018-yilga ruxsatnoma shakllarini almashish uchun qo‘shimcha kvotalar belgilash va 2019-yilga mo‘ljallangan kvotalarni muhokama qilindi, jumladan, yangi kelishuv qoidalarini hisobga olgan holda fikrlar almashildi, shuningdek, O‘zbekiston va Turkiya o‘rtasidagi avtomobil transportiga oid amaliy masalalar ko‘rib chiqildi.
Xalqaro avtomobil transporti bo‘yicha O‘zbekiston—Turkiya qo‘shma komissiyasining yig‘ilishi yakunlari bo‘yicha yakuniy protokol imzolandi.
Izoh (0)