Ўзбекистонда жисмоний ва юридик шахслар автомобилларини видеорегистраторлар билан жиҳозлаш ва уларни Тошкент тажрибасини инобатга олган ҳолда қўллашнинг норматив тартибини ўрнатиш бўйича чораларни амалга ошириш режалаштирилмоқда. Бу Вазирлар Маҳкамасининг 19 майдаги 2018–2022 йиллар учун Йўл ҳаракати хавфсизлигини таъминлаш концепциясини тасдиқлаш тўғрисидаги қарорида назарда тутилган, деб хабар беради «Газета.uz».
Сентябрь ойига қадар жисмоний ва юридик шахслар автомобилларига ўрнатилган видеорегистраторлардан видеоёзувларни оператив тўплашнинг маркази тизимини жорий этиш тартиби бўйича ҳукумат ҳужжати лойиҳаси ишлаб чиқилади.
Электрон тизимга келиб тушадиган видеоёзувлар ички ишлар органларига юборилиб, улар орқали йўл ҳаракати қоидалари бузилиши ҳолатлари аниқланади.
Видеоматериалларни марказий тизимга юборадиган фуқароларни рағбатлантириш механизмлари ишлаб чиқилади. Бунда видеоматериаллар етказувчи фуқароларнинг махфийлиги таъминланади.
Жамоат транспорти ҳамда йўловчи ташувчи транспортда видеорегистраторлар ўрнатилиши мажбурий этиб белгиланади.
Изоҳ (0)