Payariqdagi bu bino omborxona emas. Unda 35 nafar o‘quvchi tahsil oladi (foto)

Payariq tumanidagi 34-umumta’lim maktabi filialini ilk bor ko‘rgan kishi omborxona bilan adashtirishi aniq. Bu haqda “Zarafshon” hikoya qilmoqda.

Salkam 18 yil avval bunyod etilgan ushbu ta’lim maskani bugun o‘z holiga tashlab qo‘yilgan. Maktab direktori Alisher Raimqulov bunga shunday izoh beradi:

— Filialimizda Shamolli, Tog‘qishloq va Mullaovul qishloqlaridan kelgan 35 nafar o‘quvchi ta’lim oladi. Ularga 6 nafar o‘qituvchi biriktirilgan. Bir vaqtning o‘zida 1-3-sinf o‘quvchilariga bitta sinfda, 2-4-sinf o‘quvchilariga esa alohida sinfda dars o‘tiladi. Ushbu binoni ta’mirlash uchun tuman xalq ta’limi bo‘limiga maktabning fotosuratlari hamda dalolatnoma bilan murojaat qilganmiz.

Maktab devorining nurab qolganini ko‘rgan kishi borki, binoga kirishga ikkilanadi. Kirish eshigiga qulf ham o‘rnatilmagan. Darvoqe, derazalarning oynasi bo‘lmagach, qulfga na hojat?

Binoga kirib shiftda yantoq va xas-xashaklarning osilib turganini ko‘rib, “Bu yerdan ilon chiqib qolsa-ya”, degan o‘y bilan vujudingizni sovuq ter bosadi. Yosh bolalarning joniga to‘zim bersin, deysiz nogoh. Binodagi ikkita xona amal-taqal qilib ta’mirlangan. Partalar butkul yaroqsiz ahvolda.

Sinf xonalardagi chiqindilarning uyulib ketgani oylar davomida tozalanmaganidan darak.

Tasavvur qiling, yomg‘ir yog‘sa yoki Shamollida shamol, to‘zon tursa, o‘quvchilar qay ahvolda qoladi.

Qishda xonalarni isitish masalasini gapirmasa ham bo‘ladi. Bolalar uchun sport maydonchasi ham yo‘q.

Nahotki, tuman hokimligi, xalq ta’limi bo‘limi muammoning yechimi bilan qiziqmasa?